Türkiyə və Suriya yeni mərhələyə qədəm qoyur: Ankaranın strateji hədəfi nədir?
Suriyada daxili siyasi proseslərin yeni mərhələyə qədəm qoyduğu bir vaxtda, keçid dövrü prezidenti Əhməd əş-Şaranın Səudiyyə Ərəbistanına səfəri regionda mühüm geosiyasi siqnallar verir. Bu səfər Suriyanın ərəb dünyası ilə əlaqələrini yenidən qurmaq cəhdlərinin bir hissəsi kimi qiymətləndirilir. Lakin indi siyasi dairələrin diqqəti başqa bir əsas aktora – Türkiyəyə yönəlib. Ankara uzun illərdir Suriya məsələsində aktiv rol oynayır və bölgədəki proseslərə birbaşa təsir etmək imkanına malikdir.
Türkiyə və Suriya arasındakı münasibətlərdə mühüm bir mərhələ yaşanır. Suriyanın keçid dövrü prezidenti Əhməd əş-Şaranın Türkiyə Prezidenti Rəcəb Tayyib Ərdoğanla görüşü regionda yeni siyasi dinamikanın formalaşdığını göstərir. Bu görüş təkcə ikitərəfli əlaqələrin gələcəyi deyil, həm də Suriya böhranının həlli, təhlükəsizlik məsələləri və qaçqın siyasəti baxımından böyük əhəmiyyət kəsb edir.
Bu kontekstdə, Cross Media Təhlil Mərkəzinin analitiki, Yaxın Şərq məsələləri üzrə mütəxəssis Vüqar Zifəroğlu Crossmedia.az-a açıqlamasında Türkiyənin Suriya siyasətinin əsas prioritetlərindən və mümkün diplomatik manevrlərindən danışıb.
Vüqar Zifəroğlu qeyd edib ki, Türkiyə Suriya münaqişəsində aktiv iştirak edən əsas regional güclərdən biridir və onun siyasəti təhlükəsizlik, qaçqın böhranı və milli maraqlar əsasında formalaşır. Ankara üçün prioritet məsələlərdən biri sərhədlərində sabitliyin təmin olunmasıdır. Bu çərçivədə Türkiyə YPG/PYD və PKK təhlükəsini aradan qaldırmaq məqsədilə hərbi əməliyyatlar həyata keçirir. Bundan əlavə, Şimali Suriyada təhlükəsiz zona yaratmaq planları həm Türkiyəni kürd qruplaşmalarından qorumağa, həm də suriyalı qaçqınların geri qaytarılmasına xidmət edir.
V.Zifəroğlu vurğulayıb ki, Türkiyə üçün ikinci əsas hədəf qaçqın böhranının həllidir. Hazırda ölkədə yaşayan təxminən 3,6 milyon suriyalı qaçqının təhlükəsiz zonalara yerləşdirilməsi Ankaranın sosial-siyasi təzyiqləri azaltmaq və bölgədəki təsirini gücləndirmək strategiyasına uyğundur.
Ekspert əlavə edib ki, görüşdə bu məsələlərin, eləcə də Türkiyənin Suriyanın yeni hökumətinə verə biləcəyi siyasi və iqtisadi dəstəyin mümkün istiqamətlərinin müzakirə edildiyini söyləmək olar.
Nihat Tahirov
12:29 05.02.2025
Oxunuş sayı: 3580
