Tramp üçün risklər var: Suriyada vəziyyət qarışa bilər
ABŞ-nin yeni administrasiyası qoşunlarını Suriyadan çıxarmaq qərarına gəlməsi barədə informasiyalar ortalığa çıxmaqdadır. Suriyada Amerikaya qarşı əhval – ruhiyyə getdikcə vüsət alır. Suriya da daxil olmaqla region dövlətləri indi öz talelərini özləri həll etməyə çalışırlar. ABŞ-nin regionda mövcudluğuna qarşı etirazlar yüksəlir. Bu etirazlar ABŞ və Prezident Donald Tramp administrasiyası üçün təhlükəli hal almağa başlayır. İndiki anda “Böyük Amerika” uğursuzluqlara deyil, uğur hekayələrinə köklənməyə ciddi ehtiyac duyur.
Tramp ABŞ prezidenti kimi fəaliyyətə başladıqdan sonra ABŞ-nin Suriyadan qoşunlarını çıxaracağı ilə bağlı fikirlər yenidən gündəmə gəlib. Vaşinqton terror təşkilatı PKK-ya və onun Suriyadakı birləşmələrinə verdiyi dəstəyin nəyin bahasına başa gələcəyindən xəbərdardır...
Bu barədə Crossmedia.az-a danışan politoloq, professor Əlimusa İbrahimov xatırladıb ki, Trampın andiçmə mərasimindən sonra ABŞ qoşunlarının Suriyanın şimal-şərqindən çıxarılması ehtimalı ilə bağlı xəbərlər yenidən gündəmə gəlib: “İsrail mediası Tramp administrasiyasının Suriya Ərəb Respublikasından qoşunların çıxarılması qərarı barədə Təl-Əvivi məlumatlandırdığını bildirib. Tramp 2000 ilə 2500 arasında olduğu bildirilən ABŞ əsgərlərinin ilk prezidentlik müddətində Suriyadan çıxarılmasına qərar versə də, bu qərar icra olunmayıb. Ötən il Suriyada ABŞ Mərkəzi Komandanlığının (CENTCOM) tərkibində 900 amerikalı əsgərin olduğu bildirilirdi. Amma Əsəd rejiminin devrilməsindən sonra onların sayı 2000-ə yüksəlib”.
Analitikin sözlərinə görə, Tramp qarşıda ciddi risklər olduğunu çox aydın görür: “Suriyanın şimal-şərqində proksi qüvvələrin yaradılması bir tərəfdən çox vaxt aparacaq, digər tərəfdən regional dövlətlərlə uzunmüddətli hakimiyyət mübarizəsinə yol açacaq. Vaşinqton PKK-nın Türkiyə və İraqdakı fəaliyyətinin ona baha başa gəldiyini dərk etməyə başlayıb. Tramp Suriya və İraqla münasibətdə istədiyi məqsədlərə ümumilikdə nail olduğunu başa düşür. Növbəti addımlar və ya regionda ləngimək mövcud nailiyyətlərin itirilməsi ilə nəticələnə bilər. Bölgədə yeni vətəndaş müharibəsi Trampın ən çox qorxduğu məsələdir. “Böyük Amerikaya” ideyasının reallaşması üçün yeni uğurlu addımlar atılmalıdır ki, bu, Trampın və ABŞ-nin imicinə xeyir versin”.
Kənan Novruzov
11:41 03.02.2025
Oxunuş sayı: 13166
