Ərəb ölkələrindən Misirə qarşı hansı təhdid var? - Ekspert
Məlum olduğu kimi ABŞ-nin yeni vəzifəsinin icrasına başlamış prezidenti Donald Tramp İsrail ilə Həmas arasında atəşkəsə nail olmaq çərçivəsində fələstinlilərin Qəzzadan Misir və İordaniyaya köçürülməsinin zəruriliyi barədə bəyanatla çıxış etmişdi. O bu təklifini Qəzzanın İsrail hərbçiləri tərəfindən demək olar ki, tamamilə darmadağın edilməsi ilə əlaqələndirmişdi. Misir və İordaniya dövlət başçıları və eləcə də Fələstinlilər Trampın bu çağırışına dərhal etiraz etdilər. Hətta Misirdə Trampın bu qərarına etiraz olaraq kütləvi nümayişlər də keçirildi. Şənbə günü ərəb xarici işlər nazirlərinin toplantısında isə , ABŞ prezidenti Donald Trampın bu çağırışına qarşı vahid mövqe nümayiş etdirərək, fələstinlilərin öz torpaqlarından istənilən səbəb altında köçürülməsi ideyasını rədd ediblər.
Misir, İordaniya, Səudiyyə Ərəbistanı, Qətər, Birləşmiş Ərəb Əmirlikləri, Fələstin Muxtariyyəti və Ərəb Liqasının xarici işlər nazirləri və rəsmiləri Qahirədə keçirilən görüşdən sonra birgə bəyanatda belə bir addımın regionda sabitliyi təhdid edəcəyini, sülh perspektivlərini sarsıdacağını, münaqişənin yayılmasına səbəb olacağını bildiriblər.
Bu barədə Crossmedia.az-a danışan politoloq, professor Əlimusa İbrahimov bildirib ki, Misir Prezidenti Əbdülfəttah əs-Sisi çərşənbə günü Misirin Qəzzalıların köçürülməsinə şərait yaradacağı barədə Trampın fikrini rədd edib və misirlilərin etirazlarını bildirmək üçün küçələrə çıxacaqlarını elan edib: “Bununla belə, cümə axşamı Tramp ABŞ-nin həm Misirə, həm də İordaniyaya hərbi yardım da daxil olmaqla ciddi dəstək verdiyinə istinad edərək, “Biz onlar üçün çox şey edirik və onlar da bizim təklifimizi qəbul etmək məcburiyyətindədirlər” deyərək öz fikrini təkrarlayıb. Fələstinlilərin müstəqil dövlətin bir hissəsini yaratmaq istədikləri ərazi olan Qəzzanı tərk etmələri ilə bağlı hər hansı bir təklif nəsillər boyu Fələstin rəhbərliyi və xalqının ciddi etirazı ilə qarşılanıb. 2023-cü ilin oktyabrında Qəzza müharibəsi başlayandan bəri də qonşu ərəb dövlətləri tərəfindən dəfələrlə rədd edilib. İordaniyada artıq bir neçə milyon fələstinli yaşayır. Yenidən buraya Qəzzada yaşayanların kiçik bir hissəsinin köçürülməsi belə demoqrafik vəziyyəti dəyişə bilər ki, bu hakimiyyət üçün ciddi siyasi nəticələrə səbəb olar. On minlərlə fələstinli isə Misirdə yaşayır. Misir Qəzzadan olan fələstinliləri qəbul etməklə Kemp Devid sövdələşməsi zamanı olduğu kimi Ərəb ölkələrinin boykotu ilə yenidən üzləşmək istəməzdi”.
Kənan Novruzov
17:25 02.02.2025
Oxunuş sayı: 8048
