Türkiyə Suriyaya görə İsraillə müharibəyə başlayacaq?: “Ən ciddi təhlükə…”
Əhməd Əş-Şəraa Suriyanın Prezidenti kimi xalqa ilk müraciətində ölkənin ərazi bütövlüyünü təmin edəcəyinə söz verib.
“Qarşıdakı
dövrdə biz bir sıra prioritet məsələlərin həllinə diqqət yetirəcəyik ki,
bunlardan biri də vahid iqtidar altında, vahid torpaqda bütün Suriyanın ərazi
bütövlüyünün bərpası prosesinin başa çatdırılmasıdır”, – Əş-Şəraa vurğulayıb.
O həmçinin keçid hökumətinin
formalaşdırılması üzərində işlərin aparıldığını qeyd edib.
“Biz bütün suriyalıların, o cümlədən
qadınların və gənclərin maraqlarını təmsil edəcək keçid hökumətinin
formalaşdırılması üzərində işləyəcəyik”, – Əş-Şəraa bildirib.
Bu, yeni prezident üçün kifayət qədər
iddialı bəyanatdır. Belə ki, keçən ilin dekabrında Bəşər Əsəd rejimin
devrilməsindən sonra hakimiyyətə gələn Əhməd Əş- Şəraa hələ ki, sadəcəkeçid
hakimiyyətini idarə edir. Onun gələcəkdə də dövləti idarə edib – etməyəcəyi
məlum deyil.
Üstəlik, nəzərə almaq lazımdır ki, hazırkı anda Dəməşqin prioritetləri tamamilə ölkənin yenidənqurulması, bərpası ilə bağlı olmalıdır. Belə bir vaxtda Suriyanın ərazi bütövlüyünü bərpa etməsi nə qədər realdır?
Bu barədə Crossmedia.az-a danışan
politoloq, professor Əlimusa İbrahimov bildirib ki, bu, o qədər də asan məsələ
deyil: “Suriyanın ərazi bütövlüyünü təmin etməsi üçün xeyli vaxta ehtiyac var.
Əvvəlcə dövlət formalaşmalı, ona qarşı sanksiyalar aradan qaldırılmalı, digər
oyunçularla münasibətlər qurulmalıdır. Hazırda Suriyanın ərazi bütövlüynə ən ciddi təhlükə İsraildən gəlir”.
Politoloqun
sözlərinə görə, Əhməd Əş- Şəaraanın verdiyi bəyanatlar real deyil: “Hər halda
Suriyanın ərazi bütövlüyünün bərpası yaxın vaxt üçün inandırıcı görünmür.
Türkiyə isə Suriyaya görə İsraillə qarşıdurmaya getməycək. Bu, indi anda rəsmi
Ankaraya lazım deyil”.
Ə. İbrahimov onu
da bildirib ki, Əhməd Əş- Şəaraanın keçid dövründən sonra da hakimiyyətdə
qalacaq: “Əks halda o, bu qədər yükün altına gprməzdi. Görünür, Əhməd Əş-
Şəaraa özünü prezident kimi görür. Əlbəttə, bu məsələdə Türkiyənin də rolu var.
Suriyanın yeni lideri Ankaranı eşidir. Buna baxmayaraq, o, həm də ərəb
dövlətləri ilə münasibəti qorumaqla, belə demək mümkünsə, “bir əldə iki qarpız
tutur”.
Nərgiz Camalzadə
16:05 31.01.2025
Oxunuş sayı: 594
