Energetika

Pakistan şirkətləri “yaşıl enerji” sahələsində əməkdaşlığa dəvət edilib

Pakistan şirkətləri Azərbaycanda “yaşıl enerji” və enerji səmərəliliyi sahələrində əməkdaşlığa dəvət edilib.
Crossmedia.az Energetika Nazirliyinə istinadən xəbər verir ki, bu barədə nazir Pərviz Şahbazovun Pakistanın özəlləşdirmə, İnvestisiya Şurası və kommunikasiya üzrə federal naziri Abdul Alim Xanın rəhbərlik etdiyi nümayəndə heyəti ilə görüşündə bildirilib.
Görüşdə dostluq və qardaşlığa əsaslanan Azərbaycan-Pakistan münasibətlərinin müxtəlif sahələrdə uğurla inkişafından məmnunluq ifadə edilib. İkitərəfli əlaqələrin yeni səviyyəyə yüksəldilməsində enerji sahəsində mövcud imkanların reallaşdırılmasının əhəmiyyəti vurğulanıb.
Hər iki ölkənin enerji şirkətlərinin əməkdaşlıq əlaqələrinin genişləndirilməsi, gündəlikdə olan layihələrlə bağlı müzakirələr aparılıb. Həmçinin Azərbaycanın bərpa olunan enerji sahəsində həyata keçirdiyi sənaye miqyaslı layihələr, dənizdə külək enerjisinin istifadəsi və “yaşıl enerji”nin ixrac marşrutlarının yaradılması kursu çərçivəsində imkanlar nəzərdən keçirilib.
Söhbət zamanı, həmçinin Bakıda təsis olunan ECO-UNIDO Təmiz Enerji Mərkəzinin fəaliyyətinə dair fikir mübadiləsi aparılıb və ikitərəfli enerji tərəfdaşlığının möhkəmləndirilməsinə qarşılıqlı dəstək ifadə olunub.
XXX
13:29
Azərbaycan və Pakistan enerji sahəsində müxtəlif istiqamətlər üzrə ikitərəfli münasibətlərin inkişafına dair müzakirələr aparıblar.
Crossmedia.az xəbər verir ki, bu barədə Azərbaycanın energetika naziri Pərviz Şahbazov “X” sosial şəbəkəsindəki hesabında məlumat verib.
"Pakistanın özəlləşdirmə, İnvestisiya Şurası və kommunikasiya üzrə federal naziri Abdul Alim Xan ilə enerji sahəsində müxtəlif istiqamətlər üzrə ikitərəfli münasibətlərin inkişafına dair məhsuldar görüşümüz oldu. Gündəlikdə olan məsələlər, o cümlədən neft-qaz, bərpa olunan enerji və enerji səmərəliliyi üzrə əməkdaşlıq imkanlarını dəyərləndirdik", - paylaşımda qeyd olunub.