Avropa

Bu il Trampın sülhə nail olması mümkündür

2025-ci il və ondan 3 il əvvəl olduğu kimi, Rusiya-Ukrayna məsələsi diqqət mərkəzindədir. Bu dövr ərzində cəbhədəki vəziyyətdə müəyyən dəyişikliklər özünü göstərsə də, lakin bunlar müharibənin sonlanması üçün müsbət rol oynamayıb. Belə bir zamanda bir sıra dost dövlətlər, ələlxüsus da ABŞ-nin Ukraynaya dəstəyi müşahidə olunandır. Lakin son dövrlər ABŞ-də baş verən hakimiyyət dəyişiklikləri, Donald Trampın prezidentlik kürsüsünə qalxması sözügedən dəstəklər, onun müharibənin sonlanması üçün cəhdləri ilə bağlı ağıllarda bir sıra sual doğurdu. Bu mərhələdə müharibədə müşahidə olunan itkilərin sayı da mühüm rol oynayır. Elə məhz bu proseslə bağlı yaxın günlərdə ABŞ Prezidenti Donald Tramp "Rusiyanın müharibədə itkiləri Ukraynaya nisbətən daha çoxdur. Müharibə mümkün qədər tez başa çatdırılmalıdır". - deyə bildirib.
Maraqlıdır, bu fikirlər özündə nəyi ehtiva edir?
Mövzu ilə bağlı jurnalist, siyasi şərhçi Kənan Novruzov Crossmedia.az-a açıqlamasında qeyd edib ki, hansı tərəfin itkilərinin çoxluğu barədə hələ konkret olaraq fikir söyləmək mümkün deyil:
"Sözügedən prosesə elmi şəkildə yanaşsaq, Rusiyanın itkilərinin Ukraynaya nisbətən daha çox olması ağlabatandır. Çünki Rusiya hücum edən, Ukrayna müdafiə olunan tərəfdir və hərb elminə görə də, adətən, hücum edən tərəf 3 dəfə artıq itki vermiş olur. Bu baxımdan D. Trampın qeyd etdiyi fikirlər həqiqətə uyğun ola bilər. Digər bir tərəfdən bu il Trampın sülhə nail olması mümkündür. Bu isə Ukraynaya dəstəyin artırılması, azaldılması fonunda baş verə bilər. Hər halda verilən açıqlamalar onu deməyə əsas verir ki, Tramp bu məsələdə maraqlıdır. Lakin bu maraq üçün göstərilən cəhdlər tək formada olmayacaq, belə bir məqamda ABŞ Türkiyənin köməyindən istifadə edə bilər. Ələlxüsus da, Rusiyanın razı salınmasında Ankaranın böyük rolu olacaq. Məhz bunları nəzərə alaraq rəsmi Kiyev, son zamanlar Rusiyanın Kursk vilayətində fəallaşıb. Bu isə öz növbəsində, perspektivdə danışıqlar masasında Ukraynanın əlinin daha güclü olmasına hesablanıb. Bu baxımdan qeyd etmək olar ki, hələ də predmet mövzusu olan Rusiya-Ukrayna arasında sülh prosesi, müharibəyəqədərki sərhədlərin bərpa olunması ilə başa çatacaq".
Aytac Kərimova