İqtisadi xəbərlər
Dünya İqtisadi Forumu Azərbaycanı nailiyyətlərinə görə yüksək qiymətləndirib
Dünya İqtisadi Forumunun (DİF) “Impact Report: Centre for the Fourth Industrial Revolution Network 2023-2024” adlı hesabatında Azərbaycanla bağlı bölmə geniş şəkildə işıqlandırılıb.
Crossmedia.az xəbər verir ki, hesabatda qeyd edilir ki, Azərbaycanın Dördüncü Sənaye İnqilabı texnologiyalarını inteqrasiya etmək sahəsində həyata keçirdiyi təşəbbüslər ölkənin bu istiqamətdə inamla irəlilədiyini nümayiş etdirir.
Sənəddə “AI in Energy” layihəsinin süni intellektdən istifadə etməklə enerji səmərəliliyini və dayanıqlığını artırmağa yönəldiyi vurğulanır. Bununla yanaşı, “Digital FDI” proqramı Azərbaycan üçün sərmayə mühitini yaxşılaşdırmaqla startapları dəstəkləyir və rəqəmsal transformasiyanı sürətləndirir.
Hesabatda iqtisadiyyat naziri Mikayıl Cabbarovun fikirlərinə də yer verilib. O, Dünya İqtisadi Forumunun IDEA (Investing in the Digital Economy of Azerbaijan) təşəbbüsünün Azərbaycanın startaplar və innovasiyalar üçün əlverişli mühit yaratmaq istiqamətində əldə etdiyi uğurları yüksək qiymətləndirdiyini bildirib.
Hesabatın yekununda Azərbaycanın Dördüncü Sənaye İnqilabı texnologiyalarını tətbiq etməklə qlobal rəqabətliliyini artırdığı xüsusi vurğulanır.
Gültac Mehdizadə
20:27 22.01.2025
Oxunuş sayı: 13104
