“Trampın Ukrayna- Rusiyanı müharibəsini bitirməsinə icazə verməzlər”- Açıqlama
ABŞ prezidenti Donald Tramp rusiyalı həmkarı Vladimir Putinlə onun üçün əlverişli olan istənilən vaxtda görüşməyə hazır olduğunu deyib.
O, həmçinin yaxın vaxtlarda Rusiya lideri ilə danışacağına ümid etdiyini bildirib və Kiyevə silah tədarükünün dayandırılması imkanlarının araşdırıldığını təsdiqləyib.
Tramp əlavə edib ki, Çin Xalq Respublikasının Sədri Si Cinpindən Ukraynadakı müharibənin həllinə köməklik göstərməsini istəyib.
Əgər ölkə rəhbərliyi Ukraynadakı müharibənin həlli üçün danışıqlara getməsə, Rusiyaya qarşı əlavə sanksiyalar tətbiq edib-etməyəcəyi ilə bağlı suala Tramp lakonik cavab verib: “İnandırıcı səslənir”.
Eyni zamanda, o, 2020-ci il seçkilərindən sonra ABŞ-də hakimiyyətdə qalsaydı, Ukraynada münaqişənin başlamayacağını iddia edib.
Putin ağıllı siyasətçi adlandıran ABŞ-nin yeni lideri bildirib ki, Rusiya prezidenti keçmiş dövlət başçısı Cozef Baydenə hörmət etməyib.
Trampın çıxışında verdiyi mesajları Crossmedia.az-a şərh edən politoloq, Beynəlxalq Münasibətlər və Diplomatiya Araşdırmaları Mərkəzinin sədri Samir Hümbətov söyləyib ki, Trampın ifadələri, xüsusən Ukrayna müharibəsi ilə əlaqədar Çindən dəstək istənməsi və Rusiya ilə danışıqların aparılması barədə fikirlər, ABŞ xarici siyasətində müəyyən dəyişikliklərə işarə edə bilər: “Lakin tam olaraq bütün xarici siyasətin köklü şəkildə dəyişəcəyini düşünmürəm. Ukrayna müharibəsinin dayandırılması, ABŞ-nin rəsmi Kiyevə maliyyə axınını dayandırmasına hesablanıb. Söhbət milyardlarla dollardan gedir. . Bu qərar, həmçinin Rusiya və Çinlə bazarlıq etmək üçün bir vasitə ola bilər. Ukrayna müharibəsi aktiv şəkildə dayandırılsa belə, gərginliyin tamamilə sona çatacağını düşünmürəm. Uzun müddətli bir atəşkəs mümkündür. Amma bu, konfliktin tam bitəcəyi anlamına gəlmir. Digər tərəfdən, Ukraynanın gizli şəkildə silahlandırılması da mümkündür”.
Politoloq bildirib ki, ABŞ-nin keçmiş lideri Cozf Bayden Ukraynaya açıq dəstək versə də, Tramp bu dəstəyə qarşı çıxır: “Lakin, ABŞ-da siyasət yalnız bir şəxsin qərarına bağlı deyil. Bu səbəbdən, ölkənin “dərin dövləti”nin Trampa rahatlıq verməyəcəyini düşünürəm. Həmçinin, ABŞ-da nümayəndələr palatası və Konqresin də fikirləri böyük əhəmiyyət kəsb edir. Tramp onların mövqeləri ilə də hesablaşmalıdır. Buna görə, ilk mərhələdə yardımlar dayandırılsa da, bu, müharibənin tam dayanması demək deyil”.
Analitikin sözlərinə görə, Avropa dövlətləri öz təhlükəsizliklərini təmin etmək üçün müharibənin müəyyən müddət davam etməsini istəyəcəklər: “Çünki müharibənin dayandırılması Avropanın çətin vəziyyətə düşməsinə səbəb ola bilər. Lakin, Rusiyanın atacağı addımlar və sanksiyalardan necə çıxacağı hələ məlum deyil. Bu, müharibə nəticəsində ən çox itirənlər sadə insanlar, ukraynalılar və ruslar olub. Müharibə və sanksiyalar sadə xalqa ciddi şəkildə təsir edib. ABŞ-nin yeni Ukrayna siyasəti, Trampın manevrlərindən asılı olmasa da, “dərin dövlət”in tələblərinə uyğun olaraq dəyişə bilər”.
Fidan Hacızadə
16:46 22.01.2025
Oxunuş sayı: 628
