Varşavada 20 Yanvar faciəsi ehtiramla yad edilib
20 Yanvar faciəsinin 35-ci ildönümü ilə əlaqədar Azərbaycanın Polşadakı səfirliyi və Varşava Universiteti nəzdində Azərbaycanşünaslıq Mərkəzinin birgə təşkilatçılığı ilə Varşava Universitetinin Şərqşünaslıq fakültəsinin tələbələri, eləcə də Varşavada yerləşən Boleslav Prus adına 35 nömrəli orta ümumtəhsil məktəbin şagirdləri üçün mühazirələr təşkil edilib.
Crossmedia.az xəbər verir ki, Varşava Universitetinin Şərqşünaslıq fakültəsinin müəllim və tələbə heyətinin, məktəb rəhbərliyi və şagirdlərin iştirak etdikləri tədbirlərdə Azərbaycanın Polşadakı səfiri Nərgiz Qurbanova 20 Yanvarın 35-ci ildönümü mövzusunda mühazirə oxuyub.
Səfir 1990-cı ilin 20 Yanvar hadisələrinin xalqımızın tarixinə haqq və ədalətin müdafiəsi naminə küçələrə çıxmış silahsız insanların qəddarcasına qətlə yetirilməsi, eyni zamanda, bir xalqın milli azadlığı və müstəqilliyi uğrunda mərd Vətən övladlarının canlarından keçərək şəhidlik zirvəsinə yüksəlməsi kimi daxil olduğunu diqqətə çatdırıb.
Sovet hərb maşınının istiqlaliyyət, azadlıq, suverenlik istəyi ilə yaşayan Azərbaycan xalqının iradəsini qırmaq, demokratiya tələblərini boğmaq üçün qabaqcadan hazırlanmış təcavüzkarlıq aktını həyata keçirərək ağır cinayət törətdiyini bildirən N.Qurbanova, faciənin ötən əsrdə xalqımıza qarşı yürüdülmüş məkrli siyasətin növbəti təzahürü olduğunu qeyd edib. Vurğulayıb ki, Sovet rəhbərliyinin himayədarlığı ilə Ermənistanın ölkəmizə qarşı başladığı əsassız ərazi iddiaları, 250 mindən artıq soydaşımızın Ermənistan ərazisindəki əzəli torpaqlarından qovulması, onlara qarşı repressiya və etnik dözümsüzlük siyasəti, Azərbaycanı parçalamaq və torpaqlarımızı zəbt etmək təşəbbüsləri bu siyasətin digər təzahürü olub.
Səfir 20 Yanvar faciəsi zamanı 147 Azərbaycan vətəndaşının şəhid olduğunu, 744 nəfərin yaralandığını, 841 nəfərin isə qanunsuz həbs edildiyini tədbir iştirakçılarının diqqətinə çatdırıb.
Qeyd olunub ki, Ümummilli Lider Heydər Əliyev bu terror aktına açıq şəkildə etiraz edərək, ilk dəfə ona siyasi qiymət verib. Faciədən bir gün sonra – yanvarın 21-də Azərbaycanın Moskvadakı daimi nümayəndəliyinə gələn dahi siyasi xadim, yerli və xarici media üçün mətbuat konfransı keçirib, mülki şəxslərin qətlə yetirilməsini sərt şəkildə qınayıb. Ulu Öndər Azərbaycanın Prezidenti seçildikdən sonra onun təşəbbüsü ilə Milli Məclis 20 Yanvar hadisələrinə siyasi-hüquqi qiymət verib.
Tədbirlər çərçivəsində iştirakçılar 20 Yanvar faciəsini özündə əks etdirən fotolardan ibarət sərgi ilə tanış olublar. Sərgi iki həftə davam edəcək.
Sonda şəhidlərin xatirəsinə ehsan süfrəsi açılıb.
Həmçinin səfirliyin önündə Ümumxalq Hüzn Günü ilə əlaqədar xatirə guşəsi yaradılıb.
18:53 20.01.2025
Oxunuş sayı: 3983
