"Xalqımızın qüruru sarsılmadı, əksinə, azadlıq ruhu daha da alovlandı"- Açıqlama
1990-cı il yanvarın 19-dan 20-nə keçən gecə Sovet qoşunlarının Bakıya yeridilməsi nəticəsində yüzlərlə günahsız insan qətlə yetirildi, yaralandı və itkin düşdü. Bu qanlı hadisə Azərbaycan xalqının azadlıq mübarizəsinin dönməz xarakter aldığını göstərdi və ölkənin müstəqilliyə gedən yolunda mühüm dönüş nöqtəsinə çevrildi.
Hər il 20 Yanvar günü Azərbaycan xalqı tərəfindən Ümumxalq Hüzn Günü kimi qeyd edilir, şəhidlərin müqəddəs ruhu ehtiramla anılır. Bu hadisə yalnız bir faciə deyil, eyni zamanda, xalqın mübarizə əzminin və azadlıq istəyinin rəmzinə çevrilib.
Milli Məclisin deputatı Arzuxan Əlizadə Crossmedia.az-a açıqlamasında bildirib ki, Azərbaycan hər il 20 Yanvar gününü şəhidlərin müqəddəs ruhunun anım günü kimi qeyd edir: “Lakin bu gün eyni zamanda xalqımızın yazdığı qəhrəmanlıq salnaməsinin bir parçası kimi də yad olunur. Həmin gün haqsızlığa və ədalətsizliyə qarşı ayağa qalxan xalq qətliama məruz qaldı. Sovet imperiyası bütün gücü ilə Azərbaycan xalqını əzməyə çalışdı. Şəhidlər verdik, amma xalqın mübarizəsi, qüruru, azadlıq eşqi heç vaxt sönmədi. Əksinə, bu hadisələr xalqımızın azadlığa olan inamını daha da möhkəmləndirdi”.
Deputatın sözlərinə görə, 20 Yanvar hadisələri Azərbaycan xalqına mühüm tarixi dərslər verdi: “Biz dostu, düşməni ayırmağı bir daha öyrəndik. Ən önəmlisi isə xalqımızın yalnız müstəqil şəkildə varlığını qoruya biləcəyini dərk etməsi oldu. Həmin dövrdə Milli Azadlıq Hərəkatı yüksəlmişdi və onu məhv etmək üçün Azərbaycana qarşı ağır hücumlar təşkil edildi. Amma məqsədlərinə çata bilmədilər. Əksinə, 20 Yanvar hadisələri xalqın azadlıq ruhunu daha da alovlandırdı. Faciə yalnız Bakıda deyil, Azərbaycanın digər bölgələrində də qətliamlarla müşayiət olundu. Ümumilikdə 150-dən çox insan şəhid oldu. Lakin Azərbaycan xalqı bu sınaqdan da alnıaçıq çıxdı və müstəqillik uğrunda mübarizəsini davam etdirdi”.
Parlamentari müasir Azərbaycanın dünyadakı rolu barədə də danışıb: “Biz ərazi bütövlüyümüzü bərpa etmişik, 44 günlük Vətən müharibəsində böyük bir zəfər qazanmışıq. Azərbaycan artıq yalnız regional deyil, qlobal gücə malik bir dövlətə çevrilməkdədir. Bu uğurlarımızın təməlində şəhidlərimizin müqəddəs qanı dayanır. 20 Yanvar şəhidlərinin əziz xatirəsi daim yaşayacaq. Onların qanı bahasına əldə edilən müstəqilliyi qorumaq, gücləndirmək və gələcək nəsillərə ötürmək hər bir azərbaycanlının borcudur”.
Maral Şahverdili
07:43 20.01.2025
Oxunuş sayı: 12901
