İsveç portalı 20 Yanvar faciəsi barədə məqalə dərc edib
Siyasətçilər və xarici ölkələrin İsveçdəki səfirliklərinin əməkdaşları üçün nəzərdə tutulmuş “Diplomatic World Sweden” internet saytı 1990-cı ilin yanvarında baş vermiş faciəli hadisələrin 35-ci ildönümünə məqalə həsr edib.
Crossmedia.az xəbər verir ki, “Azərbaycan azadlıq mübarizəsində mühüm mərhələnin 35-ci ildönümünü qeyd edir” sərlövhəli məqalədə rəsmi məlumatlara görə, 147 nəfərin ölümünə, 744 nəfərin yaralanmasına səbəb olan sovet hərbi maşınının dinc əhaliyə qarşı vəhşicəsinə hərəkətlərindən bəhs edilir.
Məqalədə sadə insanların göstərdiyi şücaətə xüsusi diqqət yetirilir. Qorxu və zorakılığa baxmayaraq, müxtəlif peşələrə, dinlərə və sosial statuslara malik insanlar azadlıq uğrunda mübarizədə birləşdilər. Gənc tibb tələbəsi Çingiz Mustafayev baş verənləri sənədləşdirmək üçün həyatını təhlükəyə atdı ki, dünya həqiqəti bilsin. Onun adı sonralar qəhrəmanlıq rəmzinə çevrildi və o, Azərbaycanın Milli Qəhrəmanı adına layiq görüldü.
Müəllif yazır: “Bu hadisələr Azərbaycanın tarixini əbədi olaraq dəyişdirərək müstəqillik yolunun başlanğıcını qoydu”.
Yazıda qeyd olunur ki, bu gün Azərbaycan xalqının hüzn və qürur məkanına çevrilmiş Bakının Şəhidlər xiyabanında həmin qanlı hadisələrin qurbanlarının xatirəsi əbədiləşdirilir. Hər il yanvarın 20-də minlərlə insan həlak olanların xatirəsini yad etmək üçün buraya gəlir. Xiyaban boyu hər bir məzar gələcək nəsillərin azadlığı uğrunda canından keçmiş gənclərin qəhrəmanlıq hekayəsindən bəhs edir.
07:20 20.01.2025
Oxunuş sayı: 4794
