“Keyhan” qəzeti: “Cənab Pezeşkian! Siz İranın sahibi deyilsiniz”
İranın ali rəhbəri Əli Xameneyinin ofisinə tabe olan radikal və ultramühafizəkar “Keyhan” qəzeti ötən günlərdə ölkə prezidenti Məsud Pezeşkianın NBC kanalına müsahibəsində İslam Respublikasının ABŞ-la danışıqlar barədə açıqlamasını tənqid edib.
Crossmedia.az xəbər verir ki, radikal qəzet Pezeşkianın müsahibədə “İran yeni Tramp administrasiyası ilə danışmağa hazırdır” ifadəsinə reaksiya verərək yazıb:
“Cənab Pezeşkian, siz İranın sahibi deyilsiniz! Siz 4 il ərzində sizə əmanət edilən ölkəni idarə edəcək prezidentsiniz və bu əmanətdən istifadə mexanizmi, səlahiyyətlərinizin həddi qanunda aydın şəkildə müəyyən edilib... ABŞ-la danışıqları gündəmə gətirmək sizin səlahiyyətiniz xaricindədir”.
Qəzet İran prezidentinin vəzifəsinin nə olduğuna aydınlıq gətirərək yazıb: “Qisas almaq hər bir iranlının vəzifəsidir. Pezeşkian da bir iranlı kimi Qasım Süleymaninin qatili ilə danışıqlar aparmamalı, əmri yerinə yetirməlidir”.
18:10 16.01.2025
Oxunuş sayı: 2202
