Yarışdan 10 gün öncə dizimdən zədə aldım, lakin...- Tanınmış idmançı
Hər il olduğu kimi, 2024-cü il də Azərbaycan idmanı üçün uğurlu il olaraq yadda qaldı. Azərbaycan idmançıları beynəlxalq yarışlarda ölkəni ləyaqətlə təmsil edərək, 1700-ə yaxın medal qazanıblar. İlin ən böyük yarışı isə tarixi nəticə əldə etdiyimiz Yay Olimpiya Oyunları idi. Burada Azərbaycan ən yüksək yerə layiq görülərək, komanda hesabında 30-cu, müsəlman ölkələri arasında 3-cü yerdə qərarlaşıb. Bunların hər biri, bədən tərbiyəsinin inkişafı, yeni nəsil idmançıların yetişməsi və Azərbaycanın idman ölkəsi kimi gücünü müxtəlif beynəlxalq yarışlarda təsdiqləməsindən xəbər verir.
Cüdo üzrə Azərbaycan çempionatının qalibi, usta cüdoçular arasında iki qat dünya və Avropa çempionu İntiqam Ələkbərov 2024-cü ildə Azərbaycanın idman sahəsində əldə etdiyi uğurlar və özünün bu istiqamətdə fəaliyyəti ilə bağlı fikirlərini Crossmedia.az-la bölüşüb:
-İntiqam bəy, 2024-cü ili necə xatırlayırsınız?
-2024-cü il Azərbaycan idman sahəsində çox uğurlu nəticələrlə yadda qaldı. Həmin ildə Yay Olimpiya Oyunlarında cüdo yarışlarının iştirakçıları Hidayət Heydərov ilə Zelim Kotsoyev 2 qızıl medalla tarix yazdılar.
-Cüdoda nail olduğunuz uğurların ardında hansı məşq və hazırlıq prosesləri dayanır?
-Mənə görə, cüdoda qazandığım uğurlarımın hər biri məşq prosesi, təlimlərin düzgün qaydada keçməsindən irəli gəlir. Təbii ki, hər bir uğurun arxasında əziyyət, mübarizə dayanır və bu da sonda uğurlu nəticə deməkdir.
-Bu məşqlər necə təşkil olunur və sizi ən çox motivasiya edən nədir?
-Mənə motivasiya verən ailəm, dostlarım və tələbələrimdir. Onlar hər zaman mənə dəstək olur və azərkeşlik edirlər. Tələbələrimlə məşq keçmək, onların uğurlarını görmək məni peşəmə daha da bağlayır. Bunun nəticəsində komandamız uğurla irəliləyir və bu da cüdonun ölkəmizdə inkişafı deməkdir.
-Azərbaycan idmanının inkişafı ilə bağlı fikirləriniz nələrdir? İdman infrastrukturunun yaxşılaşdırılması və yeni nəsil idmançılarının yetişməsi haqqında nə düşünürsünüz?
-Ölkəmizdə idmanın inkişafı uğurlarla davam edir. Xüsusilə cüdo idman növünü deyə bilərik. Bu inkişaf yeni nəil idmançıların yetişməsinə şərait yaradır.
-İdmandakı ən çətin anlarınızı necə xatırlayırsınız?
-Bu il Las Vegasda keçirilən dünya çempionatında iştirak etdim və 3-cü yerə layiq görüldüm. Mənim üçün ən çətin məqam bu yarışda yaşandı. Belə ki, yarışdan 10 gün öncə dizimdən zədə aldım. Bu zədə ilə yarışda iştirak etdim və qalib oldum. Ağır, bir o qədər də qürurlu məqam idi.
- Hədəfləriniz nələrdir?
-Gələcəkdə yenə də bir çox yarışda iştirak edib, bayrağımızı uca zirvələrdə daldalandırmaq niyyətindəyəm.
-Fiziki güc, texniki bacarıqlar və psixoloji hazırlıq arasında necə bir balans qurursunuz?
-Mən öz tələbələrimlə hər məşqdən öncə və sonra təlim-tərbiyə, psixoloji məqamlarla bağlı söhbətlər edirəm. Fiziki məşğuliyyətlə yanaşı, elmlə də məşğul olmaqlarını söyləyirəm. Bunların hər biri vacibdir. Çünki idmançı yalnız fiziki və texniki baxımdan deyil, eləcə də psixoloji cəhətdən də hazırlıqlı olmalıdır.
-Azərbaycanda cüdo idmanının gələcəyi ilə bağlı hansı inkişafları gözləyirsiniz? Bu sahədəki inkişaflar idmançılar üçün nə kimi imkanlar yaradır?
-Azerbaycanda cüdo çox sürətlə inkişaf edir və bu inkişafa dövlətin, Cüdo Federasiyası nın dəstəyini müşahidə etmək mümkündür. Elə özümün də 2015-ci ildən fəaliyyət göstərdiyim "Judo Club 2012" nin burada adını çəkə bilərik. Sözügedən klub, bu sahənin inkişafında xüsusi yer tutur və sürətlə inkişaf edir.
-Nəhayət, cüdoçu olaraq yaşadığınız ən yaddaqalan an nə olub və bu anı necə qiymətləndirirsiniz?
-2022 ci ildə Dünya Çempionatı zamanı baş tutan final görüşü yadda qalan olub. Tam doqquz dəqiqə gürcü idmançı ilə güləşdim və son dəqiqələrdə cərimə xalı ilə qələbə qazandım. Əzmim və mübarizəm nəticəsində, tatamidən çempion olaraq çıxmağı bacardım.
Aytac Kərimova
Banuçiçək Kalbalıyeva
06:37 15.01.2025
Oxunuş sayı: 95448
