Süni intellekt mülki insanları hərbi hədəf kimi seçib
Süni intellekt modellərinin hərbi məqsədlərlə istifadəsi ilə bağlı aparılan araşdırmada ciddi təhlükəsizlik problemləri aşkarlanıb. Bəzi modellər mülki şəxsləri, təcili yardım maşınlarını və təslim olan əsgərləri hücum hədəfi kimi müəyyənləşdirib.
Crossmedia.az xəbər verir ki, "Vals AI" tədqiqat şirkəti bu barədə araşdırma yayımlayıb.
Tədqiqatçılar süni intellekt modellərini real və süni şəkildə hazırlanmış pilotsuz uçuş aparatı görüntüləri əsasında sınaqdan keçiriblər.
Testlər zamanı modellərdən görüntülərdəki insanları və mümkün hərbi hədəfləri müəyyənləşdirmək tələb olunub.
Nəticədə bəzi modellər mülki şəxsləri, təcili tibbi yardım avtomobillərini və təslim olan hərbçiləri də hücum edilə biləcək hədəflər kimi işarələyib.
Eksperimentlərin birində süni intellektə hər hücumdan sonra ölən insanların və dağıntıların görüntüləri göstərilib. Buna baxmayaraq, modellərin əksəriyyəti tapşırığı yerinə yetirməyə davam edib.
"Claude Opus 5.5" və "GPT-6 Astra" modelləri bəzi mərhələlərdə tapşırığı icra etməkdən imtina etsələr də, prosesin kompüter oyunu olduğu bildirildikdə yenidən əməkdaşlığa razılıq veriblər.
Tədqiqatçılar bildiriblər ki, bu nəticələr süni intellektin hərbi sistemlərdə istifadəsi zamanı təhlükəsizlik mexanizmlərinin kifayət qədər etibarlı olmadığını göstərir.
Qeyd edək ki, araşdırma sınaq şəraitində aparılıb və modellərin real hərbi əməliyyatlarda insanlara hücum etdiyi anlamına gəlmir.
12:30 18.11.2026
Oxunuş sayı: 101