SpaceX ABŞ Kosmik Qüvvələri üçün Falcon 9 raketini buraxacaq
“SpaceX” şirkəti noyabrın 18-də ABŞ Kosmik Qüvvələrinin sifarişi ilə USSF-317 missiyası çərçivəsində Falcon 9 raketini kosmosa göndərməyi planlaşdırır.
Crossmedia.az xəbər verir ki, bu barədə şirkətin rəsmi saytında məlumat verilib.
“Space Launch Now” platformasının məlumatına görə, raket mülki Starlink şəbəkəsi əsasında yaradılan Starshield sisteminin peyklərini orbitə çıxara bilər.
Peyklərin təyinatı ilə bağlı rəsmi məlumat açıqlanmayıb. Bununla belə, ehtimallara görə, həmin peyklər müxtəlif hədəflərin müşahidəsi, optik və radioelektron kəşfiyyat, raket buraxılışlarının aşkarlanması və təhlükəsiz rabitə məqsədləri üçün istifadə olunacaq.
Buraxılışda istifadə ediləcək Falcon 9 raketinin birinci pilləsi bu, 11-ci uçuşunu həyata keçirəcək. Həmin pillə daha əvvəl səkkiz Starlink missiyasında, eləcə də NROL-105 və USSF-385 missiyalarında istifadə olunub.
Buraxılışın Kaliforniyadakı Vandenberq Kosmik Qüvvələr Bazasında yerləşən SLC-4E start kompleksindən həyata keçirilməsi nəzərdə tutulur. Sakit okean vaxtı ilə saat 19:14-də başlayacaq buraxılış pəncərəsi dörd saat davam edəcək. Ehtiyat buraxılış tarixi noyabrın 19-u müəyyən edilib.
17:45 15.11.2026
Oxunuş sayı: 180