Malayziya hərbi raket tədarükü üçün Türkiyəni seçib
Malayziya Norveçin gəmi əleyhinə raketlərin ixracına icazə verməməsindən sonra Hərbi Dəniz Qüvvələrinin döyüş gəmilərini raket sistemləri ilə təchiz etmək üçün Türkiyəni əsas namizəd seçib.
Crossmedia.az xəbər verir ki, Malayziyanın “Bernama” dövlət informasiya agentliyi bu barədə məlumat yayıb.
Malayziyanın müdafiə naziri Məhəmməd Xalid Nordin bildirib ki, qərar Türkiyə, Fransa və İtaliyanın təkliflərinin qiymətləndirilməsindən sonra qəbul edilib.
Onun sözlərinə görə, seçim zamanı raket sistemlərinin qiyməti, çatdırılma müddəti və ilkin xərclər əsas götürülüb.
Nazir qeyd edib ki, Türkiyə Norveç istehsalı olan “Naval Strike Missile” (NSM) raketlərini əvəz etmək üçün daha münasib tərəfdaş kimi müəyyənləşdirilib.
Bununla əlaqədar Türkiyə tərəfi ilə əlavə danışıqlar aparılacaq və yekun razılaşmanın əldə olunmasına çalışılacaq.
Bildirilir ki, Malayziya daha əvvəl Norveçin “Kongsberg Defence & Aerospace” şirkətindən NSM raketləri sifariş edib. Lakin Norveç hökumətinin müvafiq ixrac lisenziyasını verməməsi nəticəsində tədarük baş tutmayıb.
Malayziya tərəfi müqavilə üzrə ödənişlərin həyata keçirildiyini və öhdəliklərin yerinə yetirildiyini bildirir. Hazırda yaranmış mübahisənin həlli üçün hüquqi prosedurlar davam etdirilir.
Türkiyənin təklif etdiyi raket sisteminin Malayziya Hərbi Dəniz Qüvvələrinin “Littoral Combat Ship” (LCS) sinifli döyüş gəmilərinə inteqrasiyası da danışıqlar zamanı ətraflı qiymətləndiriləcək.
16:40 13.11.2026
Oxunuş sayı: 146