ABŞ siyasətçisi Ukraynaya hərbi yardımın bərpasını tələb edib
ABŞ siyasətçi, demokrat Riçard Blumental Ukraynaya hərbi yardımın mümkün qədər tez bərpa edilməsinə və Rusiyaya qarşı sanksiyaların sərtləşdirilməsinə çağırıb.
Crossmedia.az xəbər verir ki, bu barədə “RBC-Ukrayna” senatorun “X” sosial şəbəkəsindəki paylaşımına istinadən məlumat yayıb.
Blumental bildirib ki, ABŞ-də keçirilən seçkilərin nəticələri Ukrayna və onun müdafiəsi məsələsini yenidən diqqət mərkəzinə gətirib.
Siyasətçi yaranmış fürsətdən istifadə edərək Konqresə xüsusi qanun layihəsi təqdim etməyi planlaşdırır. Onun təşəbbüsü qəbul olunarsa, Ukrayna ABŞ Prezidenti Donald Trampın dayandırdığı hərbi yardımı yenidən ala bilər.
Bundan əlavə, Blumental digər demokratlarla birlikdə Tramp administrasiyasından Rusiyaya qarşı sərt sanksiyaların tətbiqini və qüvvəsi dayandırılmış məhdudiyyətlərin bərpasını tələb etmək niyyətindədir.
Siyasətçi bildirib ki, Ukraynaya, xüsusilə hava hücumundan müdafiə sahəsində hərbi yardım göstərilməli, Rusiyaya təzyiq artırılmalıdır. Onun sözlərinə görə, bu addımlar Vladimir Putini real sülh danışıqlarına başlamağa məcbur etmək məqsədi daşıyır.
Blumental həmçinin Trampdan Ukrayna və Rusiya üzrə xüsusi nümayəndələrini dəyişməyi tələb edəcəyini açıqlayıb.
Demokrat siyasətçi ABŞ prezidentinə müraciət edərək, onun Ukrayna və Rusiya üzrə danışıqlarında iştirak edən nümayəndələrin dəyişdirilməsinin vacibliyini vurğulayıb. O, Stiv Uitkoffun Rusiya lideri ilə bağlı əvvəlki açıqlamasını da tənqid edib.
Bundan başqa, Blumental Konqresin “Starlink” və “Starshield” sistemləri üzərində ictimai maraqlar naminə nəzarət mexanizmi yaratmasını istəyir. O bildirib ki, bu sistemlər həm ABŞ-nin milli təhlükəsizliyi, həm də Ukrayna daxil olmaqla müttəfiqlərinin müdafiəsi baxımından mühüm əhəmiyyət daşıyır.
Qeyd edək ki, bundan əvvəl demokratların Ukrayna üçün 15 milyard dollarlıq hərbi yardım paketi hazırladığı barədə məlumat yayılmışdı. Ukrayna Prezidenti Volodimir Zelenski də demokratların seçkilərdə qələbəsindən sonra ABŞ-dən daha çox dəstək gözlədiyini bildirmişdi.
18:51 08.11.2026
Oxunuş sayı: 39
