Kuşner Avropa ilə Rusiya arasında NATO-Rusiya Şurasına bənzər dialoqun bərpasını təklif edib
Kuşner Avropa ilə Rusiya arasında NATO-Rusiya Şurasına bənzər dialoqun bərpasını təklif edib
ABŞ Prezidenti Donald Trampın xüsusi nümayəndəsi Cared Kuşner Avropanın gələcək təhlükəsizlik məsələlərinin müzakirəsi üçün Rusiya ilə dialoqun bərpa olunmasını təklif edib. O, bu prosesin NATO-Rusiya Şurasına bənzər formatda aparılmasını istəyir.
Crossmedia.az xəbər verir ki, bu barədə “RBC-Ukrayna” məlumat yayıb.
Məlumata görə, diplomatik prosesin növbəti mərhələlərindən biri noyabrın 10-11-də Əbu-Dabidə ABŞ, Ukrayna və Rusiya nümayəndələrinin iştirakı ilə keçirilməsi planlaşdırılan üçtərəfli görüş olacaq. Tərəflər atəşkəsə nail olmaq üçün mümkün kompromisləri müzakirə edəcəklər.
Kuşner isə danışıqlar prosesini genişləndirərək Avropa ölkələrini də müzakirələrə cəlb etmək niyyətindədir. ABŞ nümayəndəsinin yanaşması NATO-Rusiya Şurasının fəaliyyət modelinə əsaslanır. Soyuq müharibədən sonra yaradılan bu qurumun fəaliyyəti Rusiyanın 2014-cü ildə Ukraynaya müdaxiləsi və Krımı ilhaq etməsindən sonra dayandırılıb.
Kuşner sosial şəbəkədəki paylaşımında Əbu-Dabi danışıqlarında irəliləyiş əldə olunacağı təqdirdə Avropa ölkələrinin birbaşa iştirakı ilə daha geniş çoxtərəfli formata keçməyi planlaşdırdığını bildirib. Onun sözlərinə görə, belə dialoqun məqsədi təhlükəsizlik məsələləri üzrə müntəzəm məsləhətləşmələr aparmaq, böhran vəziyyətlərində etibarlı kommunikasiya kanalları yaratmaq, hərbi şəffaflığı artırmaq və gərginliyin qarşısını almaq üçün qarşılıqlı tədbirlər görməkdir.
Avropalı rəsmilər Rusiya ilə dialoqa hazır olduqlarını bildirsələr də, yeni təhlükəsizlik sisteminin müzakirəsinə yalnız Ukraynada atəşkəs əldə edildikdən sonra başlamağın tərəfdarıdırlar. Onların fikrincə, Ukrayna ilə bağlı razılaşma Avropanın təhlükəsizlik arxitekturasına dair mümkün sazişdən əvvəl əldə olunmalıdır.
Bəzi Avropa rəsmiləri Kuşnerin təklifinin müəyyən risklər daşıdığını etiraf etsələr də, prosesdən kənarda qalmaqdansa, danışıqlarda iştirak etməyin daha məqsədəuyğun olduğunu düşünürlər. Bununla belə, Avropa ölkələri arasında əsas yanaşma dəyişməz qalır: əvvəlcə Ukraynada atəşkəs, daha sonra Rusiya ilə Avropanın təhlükəsizliyinə dair danışıqlar.
18:28 08.11.2026
Oxunuş sayı: 39
