Ukrayna münaqişənin onun iştirakı olmadan həll ediləcəyindən ehtiyatlanır
Ukrayna hakimiyyəti enerji böhranı və Qərbin silah tədarükündə yaranan fasilələr fonunda böyük dövlətlərin münaqişənin taleyini Kiyevin razılığı olmadan müəyyənləşdirə biləcəyindən narahatdır.
Crossmedia.az xəbər verir ki, bu barədə İtaliyanın “Il FattoQuotidiano” qəzeti məlumat yayıb.
Nəşrin yazdığına görə, Ukraynanın diplomatik vəziyyəti qeyri-müəyyən, enerji təchizatı isə böhranlı olaraq qalır. Bu şəraitdə böyük dövlətlər yenidən Ukraynanın gələcəyi ilə bağlı qərarları onun iştirakı olmadan qəbul edə bilərlər.
Məqalədə qeyd olunur ki, hava hücumundan müdafiə vasitələrinin ehtiyatları tükənən Ukrayna Almaniyanın yeni “Patriot” sistemləri təqdim edə bilməməsindən məyus olub.
Qəzetə görə, diplomatik qeyri-müəyyənliyin əsas səbəblərindən biri ABŞ Prezidenti Donald Trampın vəd etdiyi “böyük və möhtəşəm saziş”in qarşıdakı görüşlərdə əldə olunacağına dair gözləntilərin zəif olmasıdır. Bu səbəbdən Ukrayna Prezidenti Volodimir Zelenski dünya güclərinin beynəlxalq təhlükəsizlik prinsipləri barədə razılığa gələ biləcəyi “yeni Yalta” ssenarisindən ciddi narahatdır.
Rusiya, ABŞ və Ukrayna arasında münaqişənin nizamlanmasına dair üçtərəfli danışıqların noyabrın 10-11-də Əbu-Dabidə keçirilməsi planlaşdırılır. Rusiya Prezidenti Vladimir Putin danışıqların noyabrın 10-da başlanacağını açıqlayıb.
Rusiya Prezidentinin mətbuat katibi Dmitri Peskov görüşlərdə Rusiya və Ukrayna üçün qarşılıqlı təhlükəsizlik təminatlarının müzakirə olunacağını bildirib. Rusiya nümayəndə heyətinə prezidentin köməkçisi Vladimir Medinski, Ukrayna nümayəndə heyətinə isə Xarici Kəşfiyyat Xidmətinin rəhbəri Rustem Umerov başçılıq edəcək.
17:19 08.11.2026
Oxunuş sayı: 25
