Hərəkətsiz vəziyyətdə belə nəfəsiniz çatmırsa, diqqətli olun
İstirahət zamanı belə yaranan nəfəs darlığı ürək çatışmazlığı və digər ciddi sağlamlıq problemlərinin əlaməti ola bilər.
Crossmedia.az xəbər verir ki, mütəxəssislərin sözlərinə görə, ürək qanı effektiv şəkildə pompalaya bilmədikdə ağciyərlərdə maye toplana bilər.
Bu hal təngnəfəsliyə və nəfəs çatışmazlığı hissinə səbəb olur. Belə əlamətlər ürək çatışmazlığından xəbər verə bilər.
Qulaqcıqların fibrillyasiyası və supraventrikulyar taxikardiya kimi ürək ritmi pozuntuları da nəfəs darlığı yarada bilər. Bu zaman qan dövranının effektivliyi azalır və toxumaların oksigenlə təminatı zəifləyir.
Nəfəs darlığının digər mümkün səbəblərindən biri də anemiyadır. Hemoqlobinin səviyyəsi aşağı düşdükdə qanın oksigen daşıma qabiliyyəti azalır və nəticədə insanda nəfəs çatışmazlığı hissi yarana bilər.
Mütəxəssislər istirahət zamanı yaranan və ya qəfil başlayan nəfəs darlığına ciddi yanaşmağı tövsiyə edirlər. Əlamət qəfil və güclüdürsə, sinə ağrısı, huşun itməsi və ya dodaqlarda göyərmə ilə müşayiət olunursa, dərhal təcili tibbi yardım çağırılmalıdır.
05:52 23.10.2026
Oxunuş sayı: 69
