Tomas Ceffersonun saç teli 200 illik sirri üzə çıxarıb
ABŞ-nin keçmiş prezidenti Tomas Ceffersona aid olduğu ehtimal edilən saç teli onun kölə Sally Hemingslə münasibətinə dair 200 illik mübahisənin araşdırılmasında mühüm genetik sübut kimi təqdim edilib.
Crossmedia.az xəbər verir ki, “Smithsonian” bu barədə məlumat yayıb.
Məlumata görə, 2011-ci ildə “Smithsonian” Milli Amerika Tarixi Muzeyinin əməkdaşları Ceffersona məxsus olmuş Müqəddəs Kitabı araşdırarkən səhifələrin arasında qırmızımtıl-sarı rəngdə saç teli aşkar ediblər. Saç telinin Ceffersona aid ola biləcəyi ehtimalı üzərində aparılan araşdırma daha sonra on ildən çox davam edən DNT tədqiqatına çevrilib.
Alimlər illər ərzində DNT fraqmentlərini bərpa edərək Cefferson və Sally Hemingsin ailə şəcərələrini genetik məlumatlarla müqayisə ediblər. Nəticədə Ceffersonun Hemingsin övladlarının atası olması ilə bağlı indiyədək əldə edilən ən mühüm sübutlardan birinin ortaya çıxdığı bildirilib.
Tədqiqatın gedişi “Smithsonian”ın tanınmış alimi Riçard Kurinin müəllifi olduğu “History by a Hair: Thomas Jefferson, Sally Hemings & Solving a 200-Year-Old Mystery” kitabında ətraflı təsvir edilib. Kitab sentyabrın 22-də nəşr olunub.
Kurin həmçinin Ceffersonun Hemingsin nəslindən olan şəxslərlə əlaqəsini müəyyənləşdirmək üçün istifadə olunan metodları izah edən elmi məqalənin əsas müəllifidir. Sentyabrın 21-də “bioRxiv” platformasında yayımlanan məqalə hələ ekspertlər tərəfindən nəzərdən keçirilməyib.
05:30 04.10.2026
Oxunuş sayı: 53
