Elif Eralpın Ağbaba izləri: Almaniyada seçki qələbəsi qazanan azərbaycan əsilli siyasətçi
Almaniyada yerli seçkilərdə qələbə qazanan sol partiyanın lideri Elif Eralpın adı son günlər yalnız siyasi uğuru ilə deyil, mənşəyi ilə də diqqət çəkir. Almaniyada yaşayan müxtəlif mühacir icmalarının onun kimliyinə dair fərqli fikirlər səsləndirməsi fonunda Elif Eralpın ata nəslinin tarixi Qərbi Azərbaycandan, daha dəqiq desək, Ağbaba bölgəsindən olduğu barədə məlumatlar yayılıb.
Sosial mediada Elif Eralpın ata nəslinin indiki Ermənistan ərazisindən, tarixi Qərbi Azərbaycandan köç etdiyini açıqlanıb. Paylaşılan məlumatlara görə Elif Eralpın ata babaları Çar Rusiyası ilə Osmanlı imperiyası arasındakı müharibələr dövründə Qarsın, hazırda Ermənistan ərazisində yerləşən Şirak bölgəsindən köç ediblər. Sözügedən ərazilərin Ağbaba, Şörəyel və keçmiş Amasiya mahallarını əhatə etdiyi bildirilir.
Tarixi mənbələrə istinadən qeyd olunur ki, 1877-1878-ci illər Osmanlı-Rusiya müharibəsindən sonra Qars, Ərdahan və ətraf bölgələrdən köç edən müsəlman əhali Pınarbaşı və qonşu ərazilərdə məskunlaşdırılıb. Elif Eralpın ailəsinin yaşadığı Pınarbaşı da həmin məskunlaşma coğrafiyasına daxil olub.
Türkiyə arxivlərində saxlanılan sənədlərdə Kayserinin Pınarbaşı və Uzunyayla ətrafının XIX əsrin ortalarından etibarən Osmanlı imperiyasının Qafqazdan gələn əhalinin yerləşdirildiyi əsas bölgələrdən birinə çevrildiyi qeyd olunur. 1861-1864-cü illərdə Qafqazdan gələn müxtəlif icmaların, o cümlədən Afşarların da Pınarbaşı-Uzunyayla ərazisində məskunlaşdırıldığı barədə məlumatlar mövcuddur.
Beləliklə, Almaniyada siyasi fəaliyyəti ilə tanınan Elif Eralpın ailə tarixinin izləri Türkiyənin Pınarbaşı bölgəsindən daha uzağa, tarixi Ağbaba torpaqlarına qədər uzanır. Onun Almaniyada doğulub böyüməsi isə bu ailə tarixinin Qafqazdan Anadoluya, oradan da Avropaya uzanan mürəkkəb miqrasiya xəritəsinin yalnız son halqasıdır.
Nigar Xəlilli
19:41 27.09.2026
Oxunuş sayı: 109
