Professor Deniz Ülke Kaynak: “Hazırda hələ münaqişənin həlli deyil, idarə olunması mərhələsindəyik”
Türkiyədə “Terrorsuz Türkiyə” prosesi ilə bağlı müzakirələr davam edərkən, Üsküdar Universitetinin İnsan və Cəmiyyət Elmləri Fakültəsinin dekanı, professor Deniz Ülke Kaynak Crossmedia.az-a məsələnin yalnız təhlükəsizlik deyil, eyni zamanda sosial, psixoloji, hüquqi və beynəlxalq ölçüləri ilə birlikdə dəyərləndirilməsinin vacibliyini bildirib.
2026–2027-ci tədris ilinin ilk dərsində tələbələrlə görüşən professor Deniz Ülke Kaynak terror, terrorizm, təhlükəsizlik və münaqişələrin idarə olunması mövzularına toxunaraq, “Terrorsuz Türkiyə” prosesinin akademik, tərəfsiz və neytral çərçivədə təhlil edilməsinin zəruriliyini vurğulayıb.
Alimin sözlərinə görə, terrorla terrorizm eyni anlayış deyil. Terror cəmiyyətdə qorxu və dəhşət yaradan hərəkətləri ifadə etdiyi halda, terrorizm siyasi məqsəd daşıyan, qorxu və psixoloji təsir vasitəsilə müəyyən siyasi nəticələr yaratmağa yönəlmiş daha geniş bir hadisədir.
Professor Deniz Ülke Kaynak uzun illər davam edən terrorun Türkiyədə yalnız təhlükəsizlik problemi deyil, eyni zamanda iqtisadi, siyasi və psixoloji nəticələr yaratdığını bildirib. Bu səbəbdən münaqişədən sülh mərhələsinə keçidin bir anda mümkün olmadığını, prosesin sosial və psixoloji tərəflərinin mərhələli şəkildə idarə edilməli olduğunu qeyd edib.
Mövcud vəziyyəti qiymətləndirən Kaynak bildirib: “Hazırda gəldiyimiz nöqtə hələ münaqişənin həlli deyil, münaqişənin idarə olunması mərhələsidir.” Onun fikrincə, Türkiyənin təhlükəsizlik narahatlıqları, regionda baş verən geosiyasi dəyişikliklər və dövlət xarici silahlı aktorların mövqelərinin zəifləməsi prosesin gedişinə təsir göstərən əsas amillər sırasındadır.
Professor Kaynak həmçinin dünyanın müxtəlif ölkələrində silahsızlanma və münaqişədən sonrakı proseslərdə beynəlxalq təşkilatların və üçüncü tərəflərin iştirak etdiyini, Türkiyənin isə bu prosesi əsasən öz daxili institutları və mexanizmləri vasitəsilə həyata keçirməyə üstünlük verdiyini bildirib.
Üsküdar Universitetində professor-müəllim heyəti və tələbələrin iştirakı ilə keçirilən ilk dərsdə universitetlərin müasir cəmiyyətdəki roluna da toxunan Deniz Ülke Kaynak qeyd edib ki, bu gün tələbələr dünyanın aparıcı universitetlərinin məlumat bazalarına asanlıqla çıxış əldə edə bilirlər. Buna görə də universitetin əsas vəzifəsi yalnız informasiya vermək deyil, tələbələrdə analitik düşüncə, fərqli mövqeləri müqayisə etmək və hadisələri müxtəlif perspektivlərdən dəyərləndirmək bacarığı formalaşdırmaqdır.
Professor Deniz Ülke Kaynakın fikrincə, “Terrorsuz Türkiyə” prosesinin davamlı nəticə verməsi üçün təhlükəsizlik tədbirləri ilə yanaşı, cəmiyyətdə etimadın gücləndirilməsi, sosial və psixoloji keçidin düzgün idarə olunması və hüquqi mexanizmlərin şəffaf şəkildə işləməsi də mühüm əhəmiyyət daşıyır.
09:42 25.09.2026
Oxunuş sayı: 45
