ABŞ-Çin rəqabəti daha mürəkkəb mərhələyə keçir
ABŞ-nin BMT-dəki səfiri Mayk Uolts Çinlə süni intellekt sahəsində rəqabətin Soyuq müharibə dövründəkindən daha mürəkkəb olduğunu bildirib.
Crossmedia.az xəbər verir ki, Anadolu Agentliyi bu barədə məlumat yayıb.
Uolts CNN-ə açıqlamasında ABŞ ilə Çin arasında güclü iqtisadi əlaqələrin mövcud olduğunu və bunun iki ölkə arasındakı rəqabəti əvvəlki qarşıdurmalardan fərqləndirdiyini deyib.
Onun sözlərinə görə, ABŞ Prezidenti Donald Tramp və Çin Prezidenti Si Cinpin arasında keçiriləcək görüş zamanı süni intellektlə bağlı müəyyən məhdudlaşdırıcı qaydaların müzakirəsi mümkündür. Bu çərçivədə alqoritmlərin yayılması, nüvə silahı sistemləri və qərarvermə proseslərində insan nəzarətinin saxlanılması kimi məsələlər nəzərdən keçirilə bilər.
Bununla belə, Uolts ABŞ daxilində innovasiyalara və sahibkarlara məhdudiyyət qoyulmasının tərəfdarı olmadığını vurğulayıb.
Arktikada təhlükəsizlik
Uolts Qrenlandiya ilə bağlı ABŞ və Danimarka arasında yeni təhlükəsizlik razılaşmasının strateji əhəmiyyət daşıdığını bildirib.
O qeyd edib ki, qitələrarası raket hücumu baş verəcəyi təqdirdə onların Arktika üzərindən gəlməsi mümkündür. Bu səbəbdən regionda radar və sensor sistemlərinin qorunması və onların fəaliyyətinə maneəsiz çıxışın təmin edilməsi Vaşinqton üçün vacib məsələlərdəndir.
ABŞ rəsmisi Arktikaya çıxış məsələsini qitənin raketdən müdafiə sistemləri, Finlandiya ilə əldə edilmiş buzqıran gəmilərlə bağlı razılaşma, NATO ölkələrinin hərbi xərclərinin artırılması, eləcə də enerji və kritik mineralların hasilatı ilə əlaqələndirib.
Uoltsun sözlərinə görə, buzlaqların əriməsi gəmiçilik üçün yeni Arktika marşrutlarının yaranmasına imkan verir və bu da regionun strateji əhəmiyyətini artırır.
ABŞ İranla bağlı mövqeyini açıqlayıb
Uolts Yaxın Şərqdə Bab əl-Məndəb, Hörmüz boğazı və Süveyş kanalı vasitəsilə mülki gəmiçiliyə mane olan tərəflərə qarşı ABŞ və müttəfiqlərinin “qətiyyətli tədbirlər” görəcəyini bildirib.
O, İranla hərbi qarşıdurmanın 2029-cu ilə qədər davam edə biləcəyi barədə məlumatlara münasibət bildirərkən zamanın Vaşinqtonun xeyrinə işlədiyini deyib.
Uolts həmçinin bildirib ki, İrana qarşı sanksiyalar nüvə proqramı və digər məsələlərlə bağlı yoxlanılmış güzəştlər əldə edilənədək davam edə bilər. Onun sözlərinə görə, bu təzyiqlərin əsas hədəflərindən biri İslam İnqilabı Keşikçiləri Korpusunun İran iqtisadiyyatındakı təsiridir. Uolts SEPAH-ın İran iqtisadiyyatının 40-50 faizinə nəzarət etdiyini iddia edib.
ABŞ-nin Yaxın Şərqdəki siyasəti çərçivəsində Səudiyyə Ərəbistanının daha fəal rol oynamasının Vaşinqton tərəfindən dəstəkləndiyi bildirilir. CNN-in məlumatına görə, ABŞ Səudiyyə Ərəbistanına hədəfləmə məlumatları və kəşfiyyat məlumatlarının ötürülməsini genişləndirir.
22:29 20.09.2026
Oxunuş sayı: 58
