Enerji xəritəsi dəyişir: Azərbaycan və Türkiyədən yeni layihələr
Türkiyənin energetika və təbii sərvətlər naziri Alparslan Bayraktar Türkiyə ilə Azərbaycanın enerji sahəsində əməkdaşlığının genişləndirilməsi və mövcud layihələrin imkanlarından tam istifadə olunmasının vacibliyini bildirib. Crossmedia.az xəbər verir ki, Anadolu Agentliyi bu barədə məlumat yayıb.
Bayraktar dünyada böhranların artıq “yeni normal”a çevrildiyini deyərək, belə bir şəraitdə Türkiyə və Azərbaycanın enerji sahəsində daha proqnozlaşdırılan, şaxələndirilmiş və intensiv əməkdaşlıq qurduğunu bildirib.
Nazir Bakı-Tbilisi-Ərzurum təbii qaz boru kəməri, TANAP və TAP kimi layihələrin əhəmiyyətini qeyd edib. Onun sözlərinə görə, TANAP vasitəsilə bu ilədək 100 milyard kubmetr təbii qaz nəql olunub. Bayraktar bu kəmərin Avropanın enerji təchizatının təhlükəsizliyinə mühüm töhfə verdiyini vurğulayıb.
Mövcud layihələrin imkanları genişləndiriləcək
Bayraktar Azərbaycan və Türkiyənin enerji sahəsində bir-birini tamamlayan imkanlara malik olduğunu bildirib. Onun sözlərinə görə, Azərbaycan mühüm neft və təbii qaz istehsalçısıdır və hazırda elektrik enerjisi istehsalçısına çevrilmək istiqamətində də irəliləyir.
Türkiyə isə enerji tələbatı artan böyük bazar olmaqla yanaşı, Avropa ilə çoxsaylı enerji bağlantılarına malikdir. Bu imkan ölkəyə regiondakı enerjinin Avropa bazarlarına çıxarılmasında mühüm rol oynamağa imkan verir.
Bayraktar bildirib ki, ilk növbədə Bakı-Tbilisi-Ərzurum, Bakı-Tbilisi-Ceyhan və TANAP kimi mövcud layihələrin gücündən tam istifadə edilməlidir.
Nazirin sözlərinə görə, Bakı-Tbilisi-Ceyhan kəməri ilə hazırda gündəlik 600 min barel neft nəql olunur. Kəmərin ümumi ötürücülük gücü isə 1 milyon bareldir.
Bayraktar Orta Asiya və Türk dünyasındakı digər mənbələrdən hasil olunan xam neftin də bu kəmər vasitəsilə nəqlinin mümkünlüyünün araşdırılmalı olduğunu deyib. O, təbii qaz sahəsində də oxşar imkanların nəzərdən keçirildiyini bildirib.
Elektrik enerjisi üzrə üç əsas layihə
Bayraktar Türkiyə və Azərbaycan arasında elektrik enerjisi sahəsində də böyük layihələrin gündəmdə olduğunu açıqlayıb.
Onun sözlərinə görə, əsas layihələrdən biri Naxçıvan üzərindən Türkiyəyə elektrik ötürmə xəttinin çəkilməsidir. Digər layihələr Türkiyə-Gürcüstan-Azərbaycan-Bolqarıstan dördtərəfli yaşıl enerji dəhlizi və Qara dənizin dibi ilə Avropaya uzanacaq elektrik ötürmə xəttidir.
Türk dövlətləri ilə əməkdaşlıq
Nazir Türkiyə və Azərbaycanın enerji sahəsində əməkdaşlığının digər türk dövlətləri ilə də genişləndirilə biləcəyini bildirib.
Bayraktar Türkmənistanın böyük təbii qaz ehtiyatlarına, Qazaxıstanın isə əhəmiyyətli neft hasilatı imkanlarına malik olduğunu qeyd edib. O, bu ölkələrin həmçinin mühüm mineral ehtiyatlara sahib olduğunu, Qazaxıstanın dünyanın əsas uran tədarükçülərindən biri olduğunu vurğulayıb.
Bayraktarın sözlərinə görə, enerji və mədən sahəsində böyük istehsal imkanlarına malik ölkələr, sənayesi güclü və enerji tələbatı artan Türkiyə ilə əməkdaşlıq etməklə yeni layihələr həyata keçirə və müxtəlif bazarlara çıxış imkanlarını genişləndirə bilərlər.
11:13 13.09.2026
Oxunuş sayı: 50
