Azərbaycan diasporunun inkişafı və əsas hədəfləri – MÜSAHİBƏ

Azərbaycan diasporunun dünyada, xüsusilə də Misirdə göstərdiyi genişmiqyaslı fəaliyyətlər, milli kimliyimizin qorunması və ölkəmizin beynəlxalq aləmdə tanıdılması baxımından böyük əhəmiyyət daşıyır. Misir-Azərbaycan Dostluq Cəmiyyətinin sədri, Dünya Azərbaycanlı Alimlər Birliyinin həmsədri, tədqiqatçı-alim Seymur Nəsirov bu istiqamətdə uzun illər ərzində yorulmadan çalışır. Crossmedia.az-a verdiyi müsahibədə alim, diaspor fəaliyyətinin müxtəlif sahələri, əldə olunan nailiyyətlər və gələcək hədəflər haqqında danışıb…

- Azərbaycan bir çox sahədə sürətli inkişaf əldə edib. Diaspor Komitəsinin bu inkişafdakı rolu barədə nə deyə bilərsiniz?

- Bildiyiniz kimi, vətənimiz bütün sahələrdə sürətlə inkişaf etməkdədir. Biz bu inkişafı Diasporla İş üzrə Dövlət Komitəsinin fəaliyyətində də görürük. Xüsusilə, İkinci Vətən müharibəsindən sonra azərbaycanlıların birləşməsi və bir olması istiqamətində Diaspor Komitəsi böyük fəaliyyət göstərmişdir.

- 2024-cü ildə həyata keçirilmiş mühüm layihələrdən və forumlardan bəhs edə bilərsinizmi?

- 2024-cü ildə bir çox böyük işlər həyata keçirilib. Bəzi nümunələri qeyd edə bilərəm: həkimlər üçün ilk dəfə forum təşkil edildi. Daha sonra mühəndislər və incəsənət xadimləri üçün forumlar keçirildi. Mənim də iştirak etdiyim Dünya Azərbaycanlı Alimlər Birliyi çərçivəsində Xaricdə Yaşayan Azərbaycanlı Alimlərin Birinci Forumu təşkil olundu. Bu forum sentyabr ayında baş tutdu və çox böyük zəhmət tələb edən bir iş idi. Bundan başqa, Türkiyədə Azərbaycanlı Alimlər Birliyi yaradıldı və müxtəlif ölkələrdə geniş fəaliyyətlər həyata keçirildi. Bütün bunlar Diaspor Komitəsinin dəstəyi ilə baş tutur.

- Dünya Azərbaycanlı Alimlər Birliyinin fəaliyyəti haqqında nə deyə bilərsiniz?

- Dünya Azərbaycanlı Alimlər Birliyi olaraq, məqsədimiz bütün dünyada yaşayan azərbaycanlı alimləri bir platformada birləşdirmək və bir çətir altında toplamaqdır. Bu məqsədlə hər ay mütəmadi olaraq toplantılar keçiririk. İdarə heyətimiz hər gün yeni alimləri dəvət edir, onların təcrübəsindən faydalanır və Azərbaycandakı elm ocaqları ilə əlaqələr qurur. Artıq bu əməkdaşlıqdan istifadə olunmağa başlanılıb.

- Qarabağ Universiteti ilə əməkdaşlıq barədə fikirlərinizi bilmək istərdik.

- Qarabağ Universiteti ilə artıq əlaqələr qurmuşuq. Qarabağ adını daşıyan bu universitetin dəstəklənməsi bizim üçün qürur mənbəyidir və borcumuzdur. Dünya Azərbaycanlı Alimlər Birliyi olaraq, universitetlərlə mütəmadi görüşlər keçiririk və gələn ay da növbəti tədbirlərimiz planlaşdırılıb.

- Sizcə, Azərbaycan diasporu artıq lobbi fəaliyyətinə keçid edə bilirmi?

- Düşünürəm ki, Azərbaycan diasporu tədricən diaspor mərhələsindən lobbi mərhələsinə keçid edir. Artıq bəzi ölkələrdə buna nail olunub. Bu proses azərbaycanlıların təşkilatlanmasının və Diaspor Komitəsinin böyük səylərinin nəticəsidir.

- Misir Azərbaycan Dostluq Cəmiyyətinin fəaliyyəti barədə danışa bilərsinizmi?

- Bizim Misir Azərbaycan Dostluq Cəmiyyətimiz həm diaspor mərkəzi, həm də azərbaycanlıların evidir. 2014-cü ildən fəaliyyət göstərir və hər gün daha geniş işlər həyata keçiririk. Misirdəki səfirliyimizlə də yüksək səviyyədə əməkdaşlıq edirik. Cəmiyyətimizdə təşkil edilən kurslarda indiyədək 60 ölkədən 2700-ə yaxın tələbə təhsil alıb və hazırda 59 ölkədən olan 642 gənc ödənişsiz əsasda Azərbaycan dili başda olmaqla müxtəlif fənlər üzrə təhsilini davam etdirir. Biz bu tələbələr vasitəsi ilə vətənimizi dünyada layiqincə təbliğ etməkdə maksimum səy göstəririk.

- Xaricdəki Azərbaycan Evlərinin rolunu necə qiymətləndirirsiniz?

- Dünya üzrə Azərbaycan Evləri azərbaycanlıların bir araya gəlməsində, dilimizin və mədəniyyətimizin təbliğində mühüm rol oynayır. Biz də bu fəaliyyətləri yaxından izləyirik və məlumatlandırırıq.

- Sizcə, diaspor işi hansı prinsiplərə əsaslanmalıdır?

- Diaspor işi könüllülük əsasında həyata keçirilir. İnsanları birləşdirərək, bir çətir altında toplamaq və vətənimizin maraqlarını müdafiə etmək böyük güc tələb edir. Əminəm ki, Diasporla İş üzrə Dövlət  Komitəsi indiyə qədər çox böyük işlər görüb və gələcəkdə də nailiyyətlərə imza atacaq.

- Sonda nə demək istərdiniz?

- Biz artıq müzəffər bir xalqıq. Lakin bu qələbəni qorumaq, Vətəni daha da inkişaf etdirmək üçün daha çox çalışmalıyıq. Hamımız Ali Baş Komandan cənab İlham Əliyevin rəhbərliyi altında birləşərək vətənimizin rifahı üçün yorulmadan çalışmalıyıq.

Nihat Tahirov