Gündəm

Gürcüstanda bir qrup sakin iki azərbaycanlının ölümü ilə bağlı aksiya keçirib

Gürcüstanın Bolnisi rayonunun Naxiduri kəndində vəziyyət gərginləşib. Sakinlər iki yeniyetmənin həyatını itirməsinə səbəb olan avtomobilin sürücüsünün törətdiyi yol-nəqliyyat hadisəsi ilə bağlı etiraz aksiyası keçirirlər.

Əraziyə xüsusi təyinatlılar cəlb edilib, vəziyyət gərgin olaraq qalır.

Marneuli-Bolnisi yolunda baş verən ağır qəzadan sonra yerli sakinlərin etirazına səbəb olan əsas səbəb təcili tibbi yardım briqadasının hərəkəti olub. İddialara görə, tibbi yardım maşını vurulan iki azərbaycanlı yeniyetməyə kömək etmək əvəzinə, hadisəni törədən və sərxoş vəziyyətdə olduğu bildirilən gürcü sürücüyə, onunla birlikdə olan şəxslərə yardım göstərməyə üstünlük verib. Yerli sakinlərin kəskin narazılığı və təcili tibbi yardım maşınının çevirməsi də bu səbəbə görə olub. Etirazçılar ədalətin təmin edilməsini və hadisəyə obyektiv yanaşılmasını tələb edirlər.

Sakinlər bildirirlər ki, sürücü avtomobili sərxoş vəziyyətdə idarə edirmiş. Onlar təcili yardım avtomobilini də aşırıblar. Həmin avtomobildə hadisəni törədən sürücünün gizləndiyi iddia edilir, həmçinin yeniyetmələri aparan avtomobilə də müdaxilə olunub.

Daxili İşlər Nazirliyinin Patrul Polis İdarəsinin Kvemo-Kartli Baş İdarəsinin əməkdaşlarının həyata keçirdikləri əməliyyat-axtarış tədbirləri və istintaq hərəkətləri nəticəsində Marneuli-Bolnisini birləşdirən yolda yol-nəqliyyat hadisəsini törətmiş sürücü, 2003-cü il təvəllüdlü T.Ç saxlanılıb.

Qeyd edək ki, hadisə zamanı 15 yaşlı Elçin Binnətov və həmyaşıdı Sinan Şərifov ölüblər.

Hadisə ilə bağlı araşdırma aparılır.

* * *

Gürcüstanın Bolnisi rayonunun Naxiduri kəndində baş verən ağır yol qəzasından sonra yaranan gərginlik artıq aradan qaldırılıb.

Yerli sakinlərin etirazı və hadisə yerində baş verən insidentlərdən sonra hüquq-mühafizə orqanlarının səfərbərliyi nəticəsində vəziyyəti normallaşdırmaq mümkün olub.

Qeyd edək ki, sürücü 2003-cü il təvəllüdlü T.Ç-nin törətdiyi yol-nəqliyyat hadisəsi nəticəsində iki azərbaycanlı yeniyetmə – Elçin Binnətov və Sinan Şərifov ölüb. Hadisədən sonra yaranan əsas narazılıq, təcili tibbi yardım briqadasının davranışı ilə bağlı idi.

Hazırda vəziyyət tam nəzarət altındadır.

İstintaq davam edir, hüquq-mühafizə orqanları baş verən hadisənin bütün detalları və səbəblərini araşdırır. Yerli sakinlər hadisə ilə bağlı ədalətin təmin olunacağına ümid edirlər. (report)