Kabardin-Balkariyada xilasetmə əməliyyatı davam edir
Kabardin-Balkariyada qar uçqununun baş verdiyi ərazidə xilasetmə qrupunun tərkibi daha 31 nəfər artırılıb, 10 alpinistin taleyi isə hələ də məlum deyil.
Crossmedia.az xəbər verir ki, regionun Fövqəladə Hallar Nazirliyi bu barədə məlumat yayıb.
Xilasetmə idarəsi axtarış-xilasetmə əməliyyatının mürəkkəb relyef və yeni qar uçqunlarının baş vermə təhlükəsi səbəbindən çətinləşdiyini bildirib.
Sentyabrın 6-da Mižirgi dağından Bezenqi dərəsinə qar uçqunu düşüb. Hadisə zamanı iki alpinist həyatla bir araya sığmayan xəsarətlər alıb, üç nəfər isə yaralanıb.
Yaralılardan birinin onurğa sütunundan xəsarət aldığı ehtimal edilir. Digər iki nəfərin ilkin olaraq döş qəfəsi və kəllə-beyin travması aldığı bildirilir.
Qar uçqununa mümkün səbəb kimi qaya uçqunu göstərilir. Bundan əvvəl ərazidə güclü qasırğa küləyi başlayıb.
Uçqundan sonra üç alpinist qarın altından özləri çıxaraq hadisə barədə təcili xidmətlərə məlumat verib. Onlar daha sonra qrupdakı iki nəfəri həyat əlamətləri olmadan aşkar ediblər.
Sağ qalan alpinistlər Mi-8 helikopteri ilə təxliyə olunub. Hadisə ilə bağlı səhlənkarlıq maddəsi ilə cinayət işi açılıb.
Qeyd edək ki, bundan əvvəl Pakistanda qar uçqunu zamanı rekordçu alpinistin həlak olduğu bildirilmişdi.
23:20 06.09.2026
Oxunuş sayı: 52
