Moskva Leypsiqdəki dron insidentinə görə Berlini günahlandırdı
Rusiya Almaniyanın Leypsiq şəhərində baş verən pilotsuz uçuş aparatı insidentini və Berlinin buna reaksiyasını təxribat hesab edir.
Crossmedia.az xəbər verir ki, Rusiyanın Almaniyadakı səfiri Sergey Neçayev “ungeskriptet” podkastında bildirib.
Diplomat qeyd edib ki, insidentlə əlaqədar Almaniya Xarici İşlər Nazirliyinə çağırılıb.
“Biz bunu qəbul etmirik. Öz tərəfimizdən bunu məqsədyönlü təxribat kimi qiymətləndiririk”, - deyə Neçayev bildirib.
O, həmçinin Berlin şəhərindəki Rusiya Evinin və Rusiyanın Bonndakı baş konsulluğunun bağlanmasını Almaniyanın ciddi siyasi səhvi adlandırıb.
Avqust ayında Leypsiq hava limanında Ukraynaya məxsus “An-124” yük təyyarəsinin yaxınlığında aşağı hündürlükdə uçan pilotsuz uçuş aparatı müşahidə edilib. Araşdırma zamanı müəyyənləşdirilib ki, dronun üzərində təxminən 800 qram partlayıcı maddə olub. Lakin detonatorun nasazlığı səbəbindən partlayıcı qurğu işə düşməyib.
Sentyabrın 1-də Almaniya hökuməti hava limanında baş verən insidenti təşkil etməkdə Moskvanı ittiham edib və Berlin şəhərindəki Rusiya Evinin, eləcə də Rusiyanın Bonndakı baş konsulluğunun bağlanması barədə qərar qəbul edib.
Bundan əvvəl Almaniya siyasətçisi Sevim Dağdelen bildirib ki, dron insidenti ilə bağlı Rusiyanın günahını təsdiqləyən sübutlar yoxdur.
12:47 05.09.2026
Oxunuş sayı: 47
