Rusiyanın keçmiş naziri Finiko işi üzrə ittiham olunub
Rusiyanın keçmiş rabitə və kütləvi kommunikasiyalar naziri Nikolay Nikiforova maliyyə piramidası Finiko işi üzrə cinayətkar birlik yaratmaq və xüsusilə külli miqdarda dələduzluq ittihamları irəli sürülüb. Crossmedia.az xəbər verir ki, “Kommersant” bu barədə məlumat yayıb.
Rusiya Daxili İşlər Nazirliyinin İstintaq Departamenti ittihamı Nikiforova qiyabi şəkildə təqdim edib. Məlumata görə, keçmiş nazir hazırda əsasən Birləşmiş Ərəb Əmirliklərində yaşayır.
İstintaqın versiyasına əsasən, Nikiforov 2019–2021-ci illərdə fəaliyyət göstərmiş Finiko maliyyə piramidasının yaradıcılarından biri olub. Şirkət vətəndaşlardan vəsaitləri qiymətli kağızlara və kriptovalyutaya investisiya etmək və yüksək gəlir əldə etmək vədi ilə cəlb edib.
İş üzrə təxminən 8 min nəfərin zərərçəkmiş olduğu və onların ümumi itkisinin təxminən 5 milyard rubl təşkil etdiyi bildirilir. İstintaqın məlumatına görə, Finiko tərəfindən toplanan vəsaitlərin bir hissəsi xaricə çıxarılıb.
“Kommersant”ın yazdığına görə, vəsaitlərin ölkə xaricinə çıxarılmasında “İnnopolis Arxitekt” şirkətinin iştirak etdiyi ehtimal olunur. Şirkətin təsisçilərindən biri Nikiforovdur.
Nikiforov 2012–2018-ci illərdə Rusiyanın rabitə və kütləvi kommunikasiyalar naziri vəzifəsində çalışıb. O, 29 yaşında nazir təyin olunaraq müasir Rusiya tarixinin ən gənc federal naziri olub. Bundan əvvəl Tatarıstanın informasiyalaşdırma və rabitə naziri vəzifəsində çalışıb.
Rusiya Mərkəzi Bankı isə Finiko-nu maliyyə piramidasının əlamətlərinə malik qurum kimi xəbərdarlıq siyahısına daxil edib.
09:49 05.09.2026
Oxunuş sayı: 50
