İlham Əliyev və Paşinyanın görüşü: Sülh gündəliyində yeni mərhələ
Azərbaycan və Ermənistan dövlət və hökumət başçıları Qırğızıstanda görüş keçiriblər. Görüş iki ölkə arasında münasibətlərin normallaşdırılması istiqamətində aparılan müzakirələrin davamı kimi qiymətləndirilir. Tərəflər arasında sülh gündəliyi və regionda davamlı sabitliyin təmin olunması məsələləri diqqət mərkəzində olub. Azərbaycan uzun müddətdir Ermənistanla münasibətlərin normallaşdırılması və bölgədə dayanıqlı sülhün təmin edilməsi istiqamətində mövqeyini ifadə edir. Bakı sülh prosesinin qarşılıqlı hörmət, ərazi bütövlüyü və suverenlik prinsipləri əsasında aparılmasının tərəfdarı olduğunu dəfələrlə bəyan edib. Son dövrlərdə Azərbaycan və Ermənistan arasında müxtəlif səviyyələrdə təmasların intensivləşməsi sülh gündəliyinin davam etdirildiyini göstərir. Prezidentlərin görüşü bu baxımdan iki ölkə arasında dialoqun davam etdirilməsi baxımından xüsusi əhəmiyyət daşıyır. Görüşün regionda uzunmüddətli sülh və əməkdaşlıq perspektivlərinə mümkün təsirləri də diqqət çəkən məsələlərdəndir. Azərbaycanın sülh istiqamətində atdığı addımların beynəlxalq müstəvidə qiymətləndirilməsi də prosesin əsas istiqamətlərindən biri hesab olunur.
Milli Məclisin deputatı Asim Mollazadə Crossmedia.az-a açıqlamasında bildirib ki, bu vaxta qədər Azərbaycanın atdığı addımlar sülh istiqamətində olub: "Çünki Azərbaycan bölgədə sülh istəyir. Ermənistanla münasibətləri normallaşdırmaq istiqamətində bir çox addımlar atılır, davamlı olaraq görüşlər keçirilir və gələcək proseslər müzakirə olunur. Azərbaycan tərəfi münasibətlərin normallaşdırılması, sülhün və sabitliyin təmin olunması istiqamətində öz mövqeyini dəfələrlə ortaya qoyub və bu istiqamətdə müxtəlif səviyyələrdə görüşlər, müzakirələr və danışıqlar davam etdirilir".
Deputat əlavə edib ki, Azərbaycanın sülh strategiyası beynəlxalq təşkilatlar tərəfindən də çox yüksək qiymətləndirilir və Azərbaycan hər bir fürsətdən istifadə edərək öz niyyətlərini dünyaya çatdırır: "Azərbaycan tərəfi sülh və əməkdaşlıqla bağlı mövqeyini beynəlxalq platformalarda da ardıcıl şəkildə ifadə edir, bölgədə davamlı sülhün və sabitliyin təmin olunmasının vacibliyini diqqətə çatdırır. Bu baxımdan Azərbaycanın indiyədək atdığı addımların əsas istiqaməti sülhün təmin olunması və Ermənistanla münasibətlərin normallaşdırılması olub”.
Zeynəb Həsən
17:30 31.08.2026
Oxunuş sayı: 52
