Gündəm

Təyyarə qəzasında həlak olan ekipaj üzvlərinin dəfn mərasiminə hazırlıq görülür

Heydər Əliyev Beynəlxalq Aeroportunda Bakı-Qroznı reysini yerinə yetirən “Embraer-190” tipli sərnişin təyyarəsinin qəzaya uğraması nəticəsində həlak olan ekipaj üzvlərinin II Fəxri Xiyabanda dəfn mərasiminə hazırlıq işləri görülür.

Dövlət və hökumət rəsmiləri, ictimaiyyət nümayəndələri xiyabana axın edirlər.

Bundan əvvəl ekipaj üzvləri ilə Heydər Əliyev Beynəlxalq Aeroportunda vida mərasimi keçirilib, Azərbaycan Prezidenti İlham Əliyev və birinci xanım Mehriban Əliyeva mərasimdə iştirak edib.

12:18

Heydər Əliyev Beynəlxalq Aeroportunda Bakı-Qroznı reysini yerinə yetirən “Embraer-190” tipli sərnişin təyyarəsinin qəzaya uğraması nəticəsində həlak olan ekipaj üzvləri ilə vida mərasimi başa çatıb. Həlak olan ekipaj üzvlərinin nəşləri Heydər Əliyev Beynəlxalq Aeroportundan dəfn üçün II Fəxri Xiyabana yola salınıb.

Həlak olanlar arasında olan ekipaj üzvləri – pilotlar İqor Kşnyakin, Aleksandr Kalyaninov və bələdçi Hökumə Əliyeva bu gün II Fəxri Xiyabanda dəfn olunacaqlar.

12:00

Bizim təyyarəmizə qeyri-qanuni müdaxilə olunub.

Bunu bu gün AZAL-ın vitse-prezidenti İlham Əmirov Aktau yaxınlığında qəzada həlak olan 3 ekipaj üzvü (pilotlar İqor Kşnyakin, Aleksandr Kalyaninov və təyyarə bələdçisi Hökümə Əliyeva) ilə Heydər Əliyev adına Beynəlxalq Hava Limanında keçirilən vida mərasimində deyib.

"Qazaxıstanda beynəlxalq standartlara uyğun olaraq texniki-araşdırma komissiyası yaradılıb.

Təyyarənin texniki-nəzarət vasitələri hələlik araşdırılmayıb, hələlik oxunmayıb. Komissiya bu işlə məşğuldur.

Sağ qalan heyət üzvlərindən və sərnişinlərin verdiyi ifadələrdən, eyni zamanda, təyyarə qəzasının məkanına baxışdan əldə olunan məlumatlar bizə deməyə birmənalı əsas verir ki, bizim təyyarəmizə qeyri-qanuni müdaxilə olunub.

Təyyarəyə qeyri-qanuni güc təsiri olub. Nəticədə təyyarə güclü şəkildə zədələnib və təyyarənin əsas idarəetmə hissələri sıradan çıxıb.

Belə bir çətin vəziyyətdə bizim pilotlarımız, heyət üzvləri, təyyarə bələdçiləri böyük soyuqqanlılıq, fədakarlıq və yüksək peşəkarlıq nümayiş etdiriblər. Bu hadisə, həmçinin, Azərbaycanın pilot hazırlığının və aviasiya təhlükəsizliyinin yüksək standartlara uyğunluğunu göstərir. Ölkəmizdə formalaşmış bu ənənələr illərdir qorunur və inkişaf etdirilir.

Günahkarlar da tapılacaq və cəzalandırılacaq. Hadisənin bütün detalları araşdırıldıqdan sonra nəticələrlə bağlı ictimaiyyətə məlumat veriləcək", - o qeyd edib.

11:29

Mən qızımla fəxr edirəm.

Bunu bu gün təyyarə qəzasında həlak olan bələdçi Hökümə Əliyevanın atası Cəlil Alıyev Aktau yaxınlığında qəzada həlak olan 3 ekipaj üzvü (pilotlar İqor Kşnyakin, Aleksandr Kalyaninov və təyyarə bələdçisi Hökümə Əliyeva) ilə Heydər Əliyev adına Beynəlxalq Hava Limanında keçirilən vida mərasimində deyib.

"Təbii ki, ağır faciədir. Bu ağır faciənin yükünü bütün xalqım, dövlətim, millətim bərabər çəkir. Onların hamısına təşəkkür edirəm. Xalqımızın başı sağ olsun. Mən qızımla fəxr edirəm. Qoy həmişə, daim yaşasın. Mən onu çox istəyirəm", - o qeyd edib.

11:20

Bakı-Qroznı istiqamətində hərəkət edən yad texniki və fiziki təsir vasitəsilə qəzaya uğraması nəticəsində biz dəyərli pilotlarımızı və sərnişinlərimizi itirmişik və bu gün onları son mənzilə yola salırıq.

Bunu bu gün Azərbaycanın rəqəmsal və inkişaf naziri Rəşad Nəbiyev Aktau yaxınlığında qəzada həlak olan 3 ekipaj üzvü (pilotlar İqor Kşnyakin, Aleksandr Kalyaninov və təyyarə bələdçisi Hökümə Əliyeva) ilə Heydər Əliyev adına Beynəlxalq Hava Limanında keçirilən vida mərasimində deyib.

10:22

Dekabrın 29-da Heydər Əliyev Beynəlxalq Aeroportunda Bakı-Qroznı reysini yerinə yetirən “Embraer-190” tipli sərnişin təyyarəsinin qəzaya uğraması nəticəsində həlak olan ekipaj üzvlərinin vida mərasimi keçirilir.

Vida mərasimində onların ailə üzvləri, rəsmi şəxslər və ictimaiyyət nümayəndələri iştirak edirlər.

Həlak olan üç ekipaj üzvü - gəmi komandiri İqor Kşnyakin, pilot Aleksandr Kalyaninov və stüardessa Hökümə Əliyeva bu gün II Fəxri xiyabanda torpağa tapşırılacaq.

Xatırladaq ki, dekabrın 25-də “Azərbaycan Hava Yolları” aviaşirkətinin J2-8243 nömrəli Bakı-Qroznı reysini yerinə yetirən “Embraer-190” təyyarəsi Aktau şəhərinin yaxınlığında qəzaya uğrayıb. Hadisə nəticəsində 38 nəfər həlak olub, 29 nəfər isə yaralanıb. (trend)

Həlak olan ekipaj üzvlərinin vida mərasimi KEÇİRİLİR