Zelenski: Almaniya Ukraynaya 600 “Patriot” raketi verəcək
Ukrayna Almaniya ilə 2027-2028-ci illərdə “Patriot” hava hücumundan müdafiə sistemləri üçün 600 PAC-2 raketinin tədarükü barədə razılığa gəlib.
Crossmedia.az xəbər verir ki, “TVP World” bu barədə məlumat yayıb. Ukrayna Prezidenti Volodimir Zelenski bildirib ki, razılaşma Almaniya kansleri Fridrix Merts ilə əldə olunub. Zelenski qeyd edib ki, Ukraynanın “Patriot” raketlərinə ehtiyacı artmaqda davam edir. Onun sözlərinə görə, Ukrayna Hərbi Hava Qüvvələri 360 raket tələb edir, lakin illik istehsalın 600 ədəd olduğu nəzərə alınaraq bu sayda raketin əldə edilməsi asan deyil.
“Patriot” sistemləri Ukrayna üçün xüsusilə əhəmiyyətlidir. Bu sistemlər hazırda Rusiyanın istifadə etdiyi ballistik raketlərin etibarlı şəkildə qarşısını ala bilən əsas hava hücumundan müdafiə vasitələrindən biridir.Ukrayna, həmçinin ABŞ-in raket ehtiyatlarından müəyyən hissənin alınması imkanlarını araşdırır. Zelenski ABŞ ehtiyatlarının 5-10 faizinin belə əldə edilməsinin Kiyev üçün faydalı olacağını və bunun üçün ödəniş etməyə hazır olduqlarını bildirib.
18:16 23.08.2026
Oxunuş sayı: 57
