Qarabağa beynəlxalq maraq artır: Tarixi həqiqətləri dünyaya necə çatdırmalı?
Azərbaycanın işğaldan azad edilmiş ərazilərində aparılan bərpa və infrastruktur layihələri beynəlxalq səyyahların diqqət mərkəzindədir. “Most Traveled People” klubunu təmsil edən, 13 ölkədən 40-a yaxın şəxsin daxil olduğu nümayəndə heyətinin Qarabağ və Şərqi Zəngəzura səfəri çərçivəsində Zəngilan rayonuna da baş çəkilib. Səyyahlara Naxçıvanla Azərbaycanın digər əraziləri arasında birbaşa quru əlaqəsini təmin etməsi nəzərdə tutulan Zəngəzur dəhlizi layihəsi barədə məlumat verilib.
Professor Qulu Məhərrəmli Crossmedia.az-a açıqlamasında bildirib ki, bu cür səfərlər Azərbaycanın tarixi və mədəni irsi ilə bağlı həqiqətlərin beynəlxalq ictimaiyyətə çatdırılmasına xidmət edir.
Onun sözlərinə görə, bölgənin tarixi, etnoqrafiyası və adət-ənənələri haqqında ətraflı məlumatların verilməsi xüsusilə vacibdir. Professor qeyd edib ki, Azərbaycanın qonşuları milli mətbəxdən tutmuş tarixi və memarlıq abidələrinə qədər bir sıra mədəni irs nümunələrini öz adlarına çıxarmağa çalışırlar: “Qonşularımız hər şeyi özəlləşdirməyə, öz adlarına çıxmağa çalışır və bununla bağlı yanlış təsəvvür yaradırlar. Ona görə də belə səfərlərin ikiqat, üçqat əhəmiyyəti var”.
Qulu Məhərrəmli hesab edir ki, səfərlərə dünyanın aparıcı media qurumlarının nümayəndələri ilə yanaşı, ictimai xadimlərin, televiziya əməkdaşlarının, bloqerlərin və tanınmış şəxslərin də cəlb olunması məqsədəuyğundur. Onun fikrincə, tanınmış şəxslərin bölgələrə səfərləri beynəlxalq diqqətin həmin ərazilərə yönəlməsinə və daha dolğun məlumatların yayılmasına imkan yaradır.
Professorun sözlərinə görə, bu yaxınlarda Bakıda akkreditə olunmuş diplomatik korpusun nümayəndələrinin Prezidentin köməkçisi Hikmət Hacıyevlə birlikdə bölgəyə səfəri də bu baxımdan əhəmiyyətli olub. O bildirib ki, belə səfərlər zamanı tarixi məkanlarla yerində tanışlıq və maddi sübutların nümayişi bölgənin keçmişi haqqında birbaşa məlumat əldə etməyə imkan verir: “Tarixi saxtakarlıqlar göz önündə olur. Bunların hamısı müsbət addımlardır və ölkənin, bölgənin təbliği baxımından xüsusi əhəmiyyət daşıyır. Bu istiqamətdə fəaliyyət ardıcıl və sistemli olmalıdır”.
Nigar Xəlilli
13:45 12.10.2026
Oxunuş sayı: 56
