Cənubi Koreya sərhədi pozan Şimali Koreya əsgərlərinə xəbərdarlıq atəşi açıb
Koreya yarımadasında gərginlik davam edərkən Şimali Koreya əsgərlərinin hərbi demarkasiya xəttini keçməsi insidentə səbəb olub. Cənubi Koreya hərbçiləri sərhəd pozuntusuna cavab olaraq xəbərdarlıq atəşi açıblar.
Crossmedia.az xəbər verir ki, hadisə ötən həftə demarkasiya xəttinin şərq hissəsində baş verib. Məlumata görə, Şimali Koreya əsgərlərindən ibarət qrup demilitarizasiya zonasında patrul xidməti apararkən sərhəd xəttini keçib.
Cənubi Koreya hərbçiləri bu cür hallarda tətbiq olunan əməliyyat prosedurlarına uyğun hərəkət ediblər. Əvvəlcə Şimali Koreya qüvvələri demarkasiya xəttinə yaxınlaşdıqda xəbərdarlıq elanları səsləndirilib. Sərhədin birbaşa keçilməsindən sonra isə xəbərdarlıq atəşi açılıb.
Atəşdən sonra Şimali Koreya əsgərləri geri çəkilib. Ərazidə daha hər hansı qeyri-adi fəaliyyət qeydə alınmayıb.
Bu, 2026-cı ildə Cənubi Koreya ordusunun sərhəd pozuntusuna görə ilk dəfə xəbərdarlıq atəşi açmasıdır.
Koreyalararası sərhəddə vəziyyət son illərdə gərgin olaraq qalır. Şimali Koreya hərbçilərinin öz ərazisində müdafiə istehkamlarının inşası və möhkəmləndirilməsi fonunda demarkasiya xəttini qısamüddətli şəkildə keçməsi halları vaxtaşırı baş verir.
Seul isə hərbi gərginliyi azaltmaq üçün diplomatik təşəbbüslər irəli sürür. Cənubi Koreya Prezidenti Li Çje Men Şimali Koreyanı danışıqlara başlamağa və mövcud müvəqqəti atəşkəsi əvəz edəcək daimi sülh sazişinin imzalanmasına çağırıb.
Bununla yanaşı, Şimali Koreya hakimiyyəti qonşu ölkələrə və onların müttəfiqlərinə qarşı sərt və aqressiv ritorikasını davam etdirir.
21:46 16.08.2026
Oxunuş sayı: 53
