Lavrov və Van İ ABŞ ilə münasibətləri müzakirə ediblər
Rusiyanın xarici işlər naziri Sergey Lavrov və Çinin xarici işlər naziri Van İ Qırğızıstanda keçirilən görüşdə ABŞ ilə münasibətləri, Ukrayna ətrafındakı vəziyyəti və beynəlxalq gündəmdəki digər məsələləri müzakirə ediblər.
Crossmedia.az xəbər verir ki, bu barədə Rusiya Xarici İşlər Nazirliyi məlumat yayıb.
Bildirilib ki, tərəflər Rusiya ilə Çin arasında hərtərəfli tərəfdaşlıq və strateji əməkdaşlıq münasibətlərinin müsbət dinamikasından məmnunluqlarını ifadə ediblər.
Görüşdə Şanxay Əməkdaşlıq Təşkilatı (ŞƏT) çərçivəsində əməkdaşlıq, o cümlədən təşkilatın fəaliyyətinin daha da təkmilləşdirilməsi kontekstində inkişaf perspektivləri ətrafında fikir mübadiləsi aparılıb.
Nazirlər həmçinin Moskva ilə Pekin arasında BMT, ŞƏT, BRICS və digər beynəlxalq platformalarda strateji koordinasiyanın gücləndirilməsinin vacibliyini vurğulayıblar.
Rusiya XİN-in məlumatına görə, görüşün yekununda tərəflər müzakirə olunan məsələlərin əksəriyyəti üzrə Rusiya və Çinin mövqelərinin üst-üstə düşdüyünü və ya bir-birinə yaxın olduğunu bildiriblər.
16:57 24.07.2026
Oxunuş sayı: 44
