Azərbaycan, Türkiyə və Pakistan ordularının birgə hərəkətinə hazırlıq görülür
Azərbaycanda təşkili nəzərdə tutulan "Birliyin Gücü – 2026" birgə hərbi təliminin planlaşdırma konfransı keçirilib. Müdafiə Nazirliyindən verilən məlumata görə, Milli Müdafiə Universitetinin tabeliyində fəaliyyət göstərən Cəmşid Naxçıvanski adına Hərbi Liseydə baş tutan tədbirdə Azərbaycanla yanaşı, Türkiyə, Pakistan, İran, Özbəkistan və Qırğızıstanın nümayəndə heyətləri iştirak ediblər. Konfrans çərçivəsində qonaqlar təlim keçiriləcək ərazi ilə əyani tanış olub, tapşırıqları dəqiqləşdirib və yekun protokol imzalayıblar. Fərqli hərbi strukturlara və strateji coğrafiyalara malik bu 6 ölkənin birgə döyüş epizodları icra etməsi regionun təhlükəsizlik arxitekturası baxımından böyük maraq doğurur. Bəs "Birliyin Gücü – 2026" platformasının əsas hərbi-strateji mahiyyəti nədir və bu irimiqyaslı əməkdaşlıq Azərbaycan Ordusuna hansı praktiki üstünlükləri qazandıracaq?
Mövzu ilə bağlı hərbi ekspert Emin Həsənli Crossmedia.az-a açıqlama verib:
"Azərbaycanın bu sahədə kifayət qədər zəngin və uğurlu təcrübəsi var. Ölkəmiz uzun illərdir ki, qardaş Türkiyə və Pakistanla irimiqyaslı birgə hərbi təlim təcrübələri keçirir. Budəfəki platformaya Özbəkistan və qonşu İranın da əlavə olunması çox mühüm və strateji bir hadisədir. Bu coğrafi tərkib regionda və dünyada baş verən proseslərə təsir etmək baxımından böyük əhəmiyyət kəsb edir. Təlimlərin əsas hərbi mahiyyəti ondan ibarətdir ki, gələcəkdə ortaq maraqlar naminə birgə addımlar atmaq zərurəti yaranarsa, bu ordular vahid komanda altında, tam koordinasiyalı şəkildə hərəkət etməyə hazır olsunlar. Hərbi təlimlər təkcə döyüş hazırlığını artırmır, həm də ordulararası təcrübə mübadiləsini və idarəetmədə operativ uzlaşmanı təmin edir. Bütün bunlar isə bütövlükdə regionda dinc birgəyaşayışın, dayanıqlı sülhün və təhlükəsizliyin qorunmasına xidmət edir".
Ekspert Azərbaycan Ordusunun yüksək döyüş hazırlığına diqqət çəkərək bu tərəfdaşlığın önəmini vurğulayıb:
"Bu gün Azərbaycanın beynəlxalq müstəvidə hərbi və siyasi nüfuzu get-gedə sürətlə artır. Xüsusilə qeyd etmək lazımdır ki, Azərbaycan İkinci Dünya müharibəsindən bəri dünya hərb tarixində öz ərazi bütövlüyünü və suverenliyini heç bir kənar kömək olmadan, sırf öz gücü hesabına təmin edən yeganə dövlətdir. Hazırda ordumuzun döyüş hazırlığı və taktiki imkanları ən yüksək seviyyədədir. Təlimdə tərəfdaş qismində iştirak edən qardaş Türkiyə və Pakistanın da qlobal miqyasda həddindən artıq böyük hərbi təcrübəsi mövcuddur. Eyni zamanda yaxın tərəfdaşımız, qardaş dövlət və strateji müttəfiqimiz olan Özbəkistan, eləcə də qonşumuz olan İran İslam Respublikası ilə bu formatda bir araya gəlmək yeni imkanlar açır. Hesab edirəm ki, bu cür çoxşaxəli hərbi əməkdaşlıq regionumuzda sabitliyin ən mühüm təminatçısı olacaq".
Fatimə Cabbarlı
15:00 20.07.2026
Oxunuş sayı: 73
