Rusiyanın Xarkov və Sumı istiqamətindəki hücumlarının qarşısı aldınıb
Rusiya ordusu Xarkov və Sumı vilayətlərinin sərhəd kəndlərində nəzarət zonası yaratmaq cəhdlərini davam etdirsə də, Ukrayna Silahlı Qüvvələri hücumların dəf edildiyini bildirir.
Crossmedia.az xəbər verir ki, "UNIAN" bu barədə Ukrayna Birləşmiş Qüvvələrinin sözçüsü Viktor Trequbova istinadən məlumat yayıb.
Onun sözlərinə görə, Rusiya hərbçiləri ötən gün Xarkov vilayətinin Çuqunivka kəndinə daxil olmağa cəhd ediblər. Ukrayna qüvvələrinin müdaxiləsi nəticəsində hücumun qarşısı alınıb və rus bölmələri yaşayış məntəqəsindən çıxarılıb. Buna baxmayaraq, onların kəndə yenidən daxil olmaq cəhdləri davam edir.
Trequbov bildirib ki, Rusiya ordusu sərhəd boyunca nəzarət zonası yaratmağa çalışır və xüsusilə Xarkov və Sumı vilayətlərindəki yaşayış məntəqələrinə təzyiq göstərir.
O əlavə edib ki, "DeepState" monitorinq layihəsinin rus qoşunlarının Tıxı yaxınlığında irəliləməsi ilə bağlı yaydığı məlumat hazırda yoxlanılır.
Volçansk istiqamətində vəziyyətin gərgin olaraq qaldığını deyən sözçü qeyd edib ki, şəhərin cənub hissəsində Ukrayna qüvvələri mövqelərini qoruyur. Onun sözlərinə görə, Rusiya ordusu Vilça istiqamətindən və Volçansk fermaları ərazisindən hücumlarını davam etdirir.
Trequbov bildirib ki, Volçya çayı hazırda donduğu üçün maneə yaratmır. Onun sözlərinə görə, hava isinənədək vəziyyət mürəkkəb olaraq qalacaq, lakin yaşayış məntəqəsi demək olar ki, tamamilə dağıdılıb.
Kupyansk istiqamətində isə rus bölmələrinin şəhərin mərkəzinin şimalında müəyyən mövqelərdə qaldığını bildirən sözçü, onların Kupyansk-Uzlovoy yaşayış məntəqəsinə daxil olması barədə Rusiya tərəfinin yaydığı məlumatları təkzib edib.
"Rusiya tərəfinin Kupyansk-Uzlovoyun ələ keçirilməsi ilə bağlı açıqlamaları həqiqətə uyğun deyil", – deyə o vurğulayıb.
Trequbovun sözlərinə görə, Rusiya ordusu Kupyanskın şərqindəki dayaq məntəqələrinə təzyiq göstərməyə davam etsə də, son altı ayda bu istiqamətdə ciddi uğur qazana bilməyib və əksinə, bəzi mövqelərini itirib.
Donetsk vilayətinin Liman istiqamətində də döyüşlərin intensiv davam etdiyini bildirən sözçü qeyd edib ki, Rusiya ordusu şəhərə doğru irəliləməyə çalışsa da, böyük itkilər verir və məqsədinə nail ola bilmir.
Trequbov həmçinin bildirib ki, Rusiya hərbçilərinin "Starlink" rabitə sistemindən istifadəsinin məhdudlaşdırılması onların koordinasiyasını zəiflədib. Bununla belə, onun sözlərinə görə, bu amil hücumların sayında ciddi azalmaya səbəb olmayıb və Rusiya qüvvələri hər gün fəal hücum əməliyyatlarını davam etdirirlər.
11:21 18.07.2026
Oxunuş sayı: 59
