ABŞ admiralı: Ukrayna sahilyanı hərbi əməliyyatlar barədə təsəvvürləri dəyişib
ABŞ-ın istefada olan admiralı Mark Montqomeri bildirib ki, Ukrayna dənizdə həyata keçirdiyi əməliyyatlarla sahilyanı döyüş taktikaları barədə mövcud yanaşmaları dəyişdirib və digər ölkələr də bu təcrübədən istifadə etməyə başlayıblar.
Crossmedia.az xəbər verir ki, Mark Montqomeri bu fikirləri "Kyiv24" telekanalının efirində səsləndirib.
Onun sözlərinə görə, Ukrayna Hərbi Dəniz Qüvvələri və kəşfiyyat strukturları sahilyanı hərbi əməliyyatların aparılması ilə bağlı əvvəlki təsəvvürləri kökündən dəyişiblər.
"Ukrayna donanması və Ukrayna kəşfiyyatı sahilyanı əməliyyatlar barədə təsəvvürləri dəyişib. Bu yanaşmalar tamamilə yenidən nəzərdən keçirilib", – deyə admiral bildirib.
Montqomeri qeyd edib ki, bir çox ölkənin hərbi donanmaları Ukraynanın tətbiq etdiyi taktikanı diqqətlə izləyir və bəzi dövlətlər artıq freqat və korvet tipli döyüş gəmilərindən imtina etməyə başlayırlar.
ABŞ admiralı Krımın gələcəyi ilə bağlı da fikirlərini bölüşüb.
"Mən bilmirəm, Ukrayna Krımı necə geri qaytaracaq, amma hərbi baxımdan siz bu müharibədə uduzmayacaqsınız", – deyə o vurğulayıb.
Bundan əvvəl The Telegraph qəzeti yazmışdı ki, Ukrayna dəniz və uzaqmənzilli pilotsuz sistemlərdən istifadəni genişləndirərək Azov dənizini Rusiya gəmiləri üçün "qəbiristanlığa" çevirib. Nəşrin istinad etdiyi Qərb ekspertlərinin fikrincə, bu strategiya Rusiyaya iqtisadi təzyiqi artırır və müharibənin xarakterini dəyişir.
17:50 17.07.2026
Oxunuş sayı: 59
