Ukraynada hökumət dəyişikliyi: Zelenski hakimiyyət və maliyyə axınlarına nəzarəti gücləndirir?
Ukraynada yeni hökumət formalaşdırılıb. Nazirlər Kabinetinə "Naftoqaz" şirkətinin sabiq rəhbəri Sergey Koretski başçılıq edir. Xarici işlər və müdafiə naziri postları isə hələ də boş qalır.
Crossmedia.az xəbər verir ki, Ukraynada hökumət dəyişikliyi Prezident Volodimir Zelenskinin hakimiyyətini daha da möhkəmləndirmək və maliyyə axınlarına nəzarəti artırmaq cəhdi kimi qiymətləndirilir.
İyulun 12-də Zelenski hökumətin dəyişdiriləcəyini açıqlayıb. Ukrayna Konstitusiyasına əsasən hökumətin istefası barədə qərarı Ali Rada qəbul etsə də, son illər ölkədə əsas qanunun tələblərinin tez-tez pozulduğu qeyd olunur.
Bununla belə, bu dəfə formal prosedurlara əməl edilib. İyulun 13-də baş nazir Yuliya Sviridenko istefa ərizəsi təqdim edib, ertəsi gün isə parlament onun istefasını təsdiqləyib. Bununla da təxminən bir il fəaliyyət göstərən Nazirlər Kabineti tam tərkibdə istefaya göndərilib.
Zelenski Sviridenkoya "yeni mühüm istiqamətə rəhbərlik etməyi" təklif etdiyini bildirib. Daha sonra onun Ukraynanın ABŞ-dəki səfiri təyin oluna biləcəyi barədə məlumat yayılsa da, Ukrayna KİV-lərinin iddiasına görə, Sviridenko Vaşinqtona getməkdən imtina edib. Bundan sonra onun Prezident Ofisində yüksək vəzifəyə gətirilə biləcəyi barədə xəbərlər ortaya çıxıb.
Mətbuatda yayılan digər iddialara əsasən, Sviridenkonun istefasının səbəblərindən biri Prezident Ofisinin qalmaqallı keçmiş rəhbəri Andrey Yermakla yaxın münasibətləri olub. Bildirilir ki, Qərb tərəfdaşları korrupsiya iddiaları fonunda onun vəzifədən uzaqlaşdırılmasını istəyiblər.
Məqalədə qeyd olunur ki, korrupsiya Ukraynanın əsas problemlərindən biri olaraq qalır. Bu kontekstdə ABŞ-nin keçmiş prezidenti Co Baydenin oğlu Hanter Baydenin son açıqlamalarına da istinad edilir. O, Ukraynanı "siyasi ilan yuvası" adlandırıb və "Burisma" qaz şirkətində formal vəzifəyə görə ildə 600 min dollar gəlir əldə etdiyini etiraf edib.
Müəllifin fikrincə, Yuliya Sviridenkonun vəzifədən uzaqlaşdırılması daha böyük siyasi qarşıdurmanın nəticəsi olub və o, bu prosesdə yalnız "qurban" rolunu oynayıb. Məqalədə hökumət dəyişikliyinin arxasında həm siyasi, həm də maliyyə maraqlarının dayandığı iddia edilir.
17:18 17.07.2026
Oxunuş sayı: 66
