KİV: Ukraynanın hərbi sistemində aparıcı rolu 20 yaşlı gənclər oynayır
Ukraynanın müdafiə sektorunda gənc mütəxəssislər getdikcə daha mühüm rol oynayır və ölkənin hərbi strategiyasında əsas hərəkətverici qüvvəyə çevrilirlər.
Crossmedia.az xəbər verir ki, bu barədə "The New York Times" nəşri yazıb.
Nəşrin məlumatına görə, bu ilin yazında Ukrayna Müdafiə Nazirliyinin 20 yaşdan bir qədər böyük əməkdaşı Danimarkanın vəd etdiyi artilleriya mərmilərinin uzaqmənzilli olmadığını müəyyən edib. O, uzunmüddətli razılaşdırma prosedurlarını gözləmədən birbaşa Danimarka rəsmiləri ilə əlaqə saxlayıb və yardım paketinin yenidən nəzərdən keçirilməsinə nail olub. Bir neçə həftə sonra Ukraynaya 15 min uzaqmənzilli artilleriya mərmisi göndərilib.
Təhlükəsizlik səbəbindən həmin əməkdaşın adı açıqlanmır. Bildirilir ki, o, universiteti yaxın zamanda bitirib. Müdafiə Nazirliyinin beynəlxalq əməkdaşlıq departamentinin rəhbər müavini Aleksey Antonyukun isə 24 yaşı var.
"The New York Times" qeyd edir ki, bu gənc kadrlar Ukraynanın müdafiə sahəsində nəsil dəyişikliyinin simvoluna çevriliblər. Onlar tədricən sovet məktəbinin nümayəndələrini əvəz edirlər.
Nəşrin yazdığına görə, Rusiya ilə canlı qüvvə və silah həcmi baxımından rəqabət aparmaq imkanları məhdud olan Kiyev əsas diqqəti innovasiyalara, xüsusilə pilotsuz uçuş aparatları və müasir hərbi texnologiyaların inkişafına yönəldib.
16:13 17.07.2026
Oxunuş sayı: 56
