Çərkəz fəalı qiyabi olaraq 7 il azadlıqdan məhrum edilib
Rusiyanın Çerkessk şəhər məhkəməsi çərkəz fəalı Kase Kik barəsində Rusiya ordusu ilə bağlı "saxta məlumat yaymaq" ittihamı ilə qiyabi olaraq 7 il azadlıqdan məhrumetmə hökmü çıxarıb.
Crossmedia.az xəbər verir ki, hökmə əsas kimi fəalın 2025-ci ilin yanvarında sosial şəbəkədə paylaşdığı video göstərilib. Məhkəmə videoda Rusiya hərbçilərinin Ukraynadakı fəaliyyəti barədə səsləndirilən fikirləri "qəsdən yalan məlumat" kimi qiymətləndirib.
Məlumata görə, Kase Kik artıq bir neçə ildir Rusiyadan kənarda yaşayır. O, 2022-ci ilin iyununda Çerkesskdə kafelərdən birində Ukrayna mahnısı sifariş etdikdən sonra saxlanıldığını bildirib. Fəalın sözlərinə görə, saxlanıldığı müddətdə hüquq-mühafizə orqanlarının əməkdaşları ona işgəncə veriblər. Daha sonra o, xırda xuliqanlıq ittihamı ilə 7 sutka inzibati həbs cəzası alıb və azadlığa buraxıldıqdan sonra ölkəni tərk edib.
Bununla yanaşı, Kase Kik bildirib ki, ona qarşı təzyiqlər davam edib. Onun sözlərinə görə, 2024-cü ilin iyulunda təhlükəsizlik qüvvələri valideynlərinin evində axtarış aparıb və bununla fəalı ailəsi vasitəsilə qorxutmağa çalışıblar.
15:17 17.07.2026
Oxunuş sayı: 46
