Türkiyəli rok ifaçısı Haluk Levent də daxil olmaqla 14 nəfər həbs edilib
Türkiyədə məşhur rok musiqiçisi Haluk Levent və daha 13 şübhəli onun rəhbərlik etdiyi Ahbap xeyriyyə təşkilatı ilə bağlı aparılan genişmiqyaslı istintaq çərçivəsində həbs olunub.
Crossmedia.az bu barədə xarici mediaya istinadən xəbər verir.
Məlumatına görə, məhkəmə musiqiçi və digər şəxslər barəsində həbs qətimkan tədbiri seçib.
İstintaqın iddiasına əsasən, 2020–2026-cı illər ərzində Haluk Leventlə əlaqəli hesablar vasitəsilə təxminən 990 milyon türk lirəsi məbləğində maliyyə əməliyyatları həyata keçirilib. Bildirilir ki, bu vəsaitin yüz milyonlarla lirəsi onlayn qumar və mərc platformalarının hesablarına köçürülüb.
Araşdırma həmçinin 2023-cü il fevralın 6-da Türkiyədə baş verən dağıdıcı zəlzələlərdən zərərçəkənlərə yardım məqsədilə Ahbap fondunda toplanan vəsaitlərin istifadəsini əhatə edir.
İddialara görə, fondun kassasından Haluk Leventin köməkçisi Yeliz Kayanın (o da həbs olunub) şəxsi hesabına təxminən 120 milyon türk lirəsi köçürülüb.
İstintaq materiallarında qeyd olunur ki, xeyriyyə yardımı vədi ilə zərərçəkən vətəndaşların bəzi daşınmaz əmlaklarının başqa şəxslərin adına keçirildiyi iddia edilir. Araşdırmaya görə, ümumi zərərin təxminən 60 milyon dollar olduğu bildirilir.
Haluk Levent və digər şübhəlilər barədə irəli sürülən ittihamlarla bağlı yekun məhkəmə qərarı hələ verilməyib.
20:40 16.07.2026
Oxunuş sayı: 63
