KİV: Paşinyanın partiyasında komitə təyinatları narazılıq yaradıb
Ermənistanın hakim "Vətəndaş Müqaviləsi" Partiyasında parlament komitələrinin sədrlərinin seçilməsi qaydasının dəyişdirilməsi daxildə narazılığa səbəb olub.
Crossmedia.az xəbər verir ki, bu barədə "Hraparak" qəzeti məlumat yayıb.
Nəşrin iddiasına görə, bundan sonra Milli Assambleyanın komitə sədrlərinə namizədlər əvvəlki kimi hakim fraksiya tərəfindən deyil, partiyanın idarə heyəti tərəfindən müəyyənləşdirilir. Partiya daxilində hesab olunur ki, bu dəyişiklik seçki prosesini formal xarakterə salır və Baş nazir Nikol Paşinyanın qərarlarının sadəcə təsdiqlənməsinə xidmət edir.
Məlumata görə, müdafiə komitəsinin sədri vəzifəsinə irəli sürülən dörd namizəd arasından Sasun Mikaelyanın seçiləcəyi gözlənilir. Nəşr iddia edir ki, Paşinyan onu tam nəzarətdə saxlamaq və zərurət yaranacağı təqdirdə asanlıqla vəzifədən uzaqlaşdırmaq niyyətindədir.
Qəzet yazır ki, təhsil və elm komitəsi müxalifətə verilməyəcəyi halda, bu posta Taqohi Qazaryanın seçilməsi ehtimalı yüksəkdir. Onun rəqibləri hazırkı komitə sədri Sisak Qabrielyan və Kocoyan məktəbinin direktoru Ruzanna Yeremyandır.
Ərazi məsələləri üzrə komitəyə isə Qarik Sarkisyanın deyil, Paşinyanın kirvəsi olduğu bildirilən Vahe Qalumyanın rəhbərlik edəcəyi iddia olunur.
Nəşrin məlumatına əsasən, əsas mübarizə səhiyyə komitəsinin sədri postu uğrundadır. Bu vəzifəyə Lusine Badalyan, Alxas Qazaryan və Trdat Sarkisyan namizəddirlər.
Qəzet bildirir ki, Trdat Sarkisyan müdafiə naziri Suren Papikyanın xaç oğludur və Papikyan onun namizədliyini dəstəkləyir. Bununla yanaşı, mənbələrin sözlərinə görə, Papikyanın öz siyasi mövqeyi də hazırda zəifləyib.
"Hraparak"ın iddiasına görə, Trdat Sarkisyan bu yarışda qalib gələrsə, gələcəkdə komitənin müxalifətə verilməsi ehtimalı da istisna olunmur.
10:43 16.07.2026
Oxunuş sayı: 57
