Ərdoğan: Yeni 15 iyul hadisələrinin yaşanmaması üçün bütün zəruri addımlar atılacaq
Türkiyə Prezidenti Rəcəb Tayyib Ərdoğan bildirib ki, ölkə FETÖ ilə mübarizəni hüquq çərçivəsində qətiyyətlə davam etdirəcək və yeni 15 iyul hadisələrinin yaşanmaması üçün bütün zəruri addımlar atılacaq.
Crossmedia.az xəbər verir ki, "Anadolu" agentliyi bu barədə məlumat yayıb.
Məlumata görə, hakim Ədalət və İnkişaf Partiyasının Siyasi və Hüquqi İşlər İdarəsi tərəfindən partiyanın baş qərargahında "Siyasi və hüquqi aspektləri ilə 10-cu ilində 15 İyul Simpoziumu" keçirilib. Prezident Rəcəb Tayyib Ərdoğan tədbir iştirakçılarına yazılı müraciət ünvanlayıb.
Ərdoğan bildirib ki, simpoziumda səsləndiriləcək fikir və qiymətləndirmələrin milli birlik və həmrəyliyin daha da möhkəmlənməsinə, həmçinin 15 iyul çevriliş cəhdinin arxasında dayanan gizli təşkilatlanmanın mahiyyətinin aydın şəkildə ortaya qoyulmasına töhfə verəcəyinə inanır.
Türkiyə Prezidenti 15 iyul 2016-cı il çevriliş cəhdi zamanı həyatını itirən 253 nəfəri ehtiramla yad edib, qazilərə isə təşəkkürünü ifadə edərək onlara cansağlığı arzulayıb.
Ərdoğanın sözlərinə görə, "xidmət", "himayə" və "təhsil" şüarlarından istifadə edərək uzun illər cəmiyyətin etimadını qazanan FETÖ-nün əsl niyyəti məhz 15 iyul gecəsi üzə çıxıb. O qeyd edib ki, çevriliş cəhdinin xalqın müqaviməti nəticəsində qarşısının alınması Türkiyənin inkişafında yeni mərhələnin başlanğıcı olub.
Prezident vurğulayıb ki, Prezident idarəetmə sisteminə keçid dövlət idarəçiliyində ikiliyi aradan qaldırıb, qərarların qəbulunu sürətləndirib və dövlətin fəaliyyətini daha səmərəli edib. Onun sözlərinə görə, bu model Rusiya-Ukrayna müharibəsi, COVID-19 pandemiyası, 6 fevral zəlzələlərinin nəticələrinin aradan qaldırılması və son İran böhranı kimi hadisələr zamanı öz üstünlüklərini nümayiş etdirib.
Ərdoğan əlavə edib ki, Türkiyə əldə etdiyi bu tarixi nailiyyətləri qorumaqda qətiyyətlidir və FETÖ ilə mübarizədə heç vaxt geri addım atmayacaq. Prezident bildirib ki, ölkəyə qarşı fəaliyyət göstərən bu təşkilatla mübarizə hüquq çərçivəsində davam etdiriləcək və yeni 15 iyul hadisələrinin təkrarlanmaması üçün bütün imkanlardan istifadə olunacaq.
10:44 15.07.2026
Oxunuş sayı: 79
