Türkiyədə NATO sammitinə qarşı etiraz aksiyaları keçirilib
Türkiyənin müxtəlif şəhərlərində Ankarada iyulun 7-8-də keçiriləcək NATO sammiti ərəfəsində etiraz aksiyaları keçirilib.
Crossmedia.az xəbər verir ki, bu barədə RİA Novosti məlumat yayıb.
Məlumata görə, etirazçılar Türkiyənin NATO-dan çıxmasını və ölkədəki hərbi bazaların alyansın istifadəsinə verilməməsini tələb ediblər.
İstanbulda eyni vaxtda iki genişmiqyaslı yürüş keçirilib. Avropa hissəsində yerləşən Taksim meydanındakı aksiya Türkiyə Kommunist Partiyasının (TKP) fəalları tərəfindən təşkil olunub. Asiya hissəsindəki Üsküdarda isə Türkiyə Gənclər Assosiasiyası, Vətən Partiyası və digər təşkilatların üzvləri etiraz aksiyası keçiriblər.
Aksiya iştirakçıları NATO-dan çıxmağa çağıran şüarlar yazılmış plakatlar qaldırıb, çıxışlarında imperializmə qarşı şüarlar səsləndiriblər.
Etiraz aksiyalarının Ankara, İzmir, Samsun, Çanaqqala və digər şəhərlərdə də davam etdiyi bildirilir.
TKP-nin mətbuat xidmətinin məlumatına görə, Ankaradakı aksiya zamanı polis bir neçə fəalı saxlayıb.
09:19 06.07.2026
Oxunuş sayı: 57
