Xarici xəbərlər

Marta Kos: Danışıqlar Cənubi Qafqazda davamlı sülhün təmin olunmasına kömək edə bilər

Avropa İttifaqının (Aİ) Genişlənmə üzrə komissarı Marta Kos bildirib ki, İrəvan, Bakı və Ankara ilə yüksək səviyyəli danışıqlar regional əlaqələndirmə sahəsində əməkdaşlığı növbəti mərhələyə daşıyıb.

Crossmedia.az xəbər verir ki, Kos bu barədə sosial şəbəkə platforması X-də paylaşım edib. O qeyd edib ki, Türkiyə, Azərbaycan və Ermənistana səfərindən yeni qayıdıb və bu ölkələrlə aparılan bağlantı işi artıq daha irəli mərhələyə keçib.

Komissarın sözlərinə görə, bu əməkdaşlıq Cənubi Qafqazda uzunmüddətli sülhün möhkəmlənməsinə töhfə verə bilər və Avropa ilə Asiya arasında ticarət və enerji marşrutlarının diversifikasiyasını gücləndirə bilər.

Marta Kos vurğulayıb ki, Aİ-nin genişlənmə siyasəti ilə regional bağlantı layihələri bir-biri ilə sıx bağlıdır və hər iki istiqamət Avropanın sabitliyi, rifahı və təhlükəsizliyinə xidmət edir.

Qeyd edək ki, Marta Kos 2 iyul tarixində Avropa Komissiyasının sədri Ursula fon der Lyayen ilə birlikdə Ermənistana səfər edib.