Yalçın Adgözəlov: Ölkəmizin uğurları saysız-hesabsızdır
Diasporla İş üzrə Dövlət Komitəsi İtaliyanın paytaxtı Roma şəhərində “Azərbaycanın mədəniyyət elçiləri” adlı toplantı keçirib.
Qeyd edək ki, toplantıda Azərbaycan Respublikasının Xalq artisti, dirijor Yalçın Adıgözəlov da iştirak edib. Xalq artisti tədbirlə bağlı fikirlərini Diasporla İş üzrə Dövlət Komitəsinin rəsmi kanalı olan Diaspor TV-yə bölüşüb.
Crossmedia.az xəbər verir ki, Y.Adıgözəlov görüşün vacibliyi məsələsinə toxunub:
“Baş tutan toplantı Azərbaycan mədəniyyəti üçün çox vacibdir. Azərbaycan sənətkarlarının, mədəniyyət işçilərinin və xaricdə yaşayan azərbaycanlıların bir araya gəlməsi, gələcəkdə səhnəyə qoyulacaq əsərlərimizin, operalarımızın, konsertlərimizin, tamaşalarımızın və sərgilərimizin təşkil edilməsi qədər vacibdir və əhəmiyyətlidir”.
Xalq artisti görüşün təşkilatçılarına təşəkkür edib:
“Mən bu toplantının ərsəyə gətirilməsində əməyi olan Azərbaycan Respublikasının Mədəniyyət Nazirliyinə, həm Diasporla İş üzrə Dövlət Komitəsinə, o cümlədən, Azərbaycanın Romadakı səfirliyinə təşəkkür edirəm”.
Y.Adıgözəlov ölkəmizin mədəniyyət sahəsindəki uğurlarından söz açaraq qeyd edib ki, Azərbaycanın dünya miqyaslı incəsənət xadimlərinin əsərləri bu tip tədbirlər sayəsində qlobal arenada geniş miqyasda nümayiş etdirilir:
“Ölkəmizin uğurları saysız-hesabsızdır. Dünyada tanınan bəstəkarlarımız, yazıçılarımız, rəssamlarımız, heykəltəraşlarımız var və biz bu şəxslərin yaradıcıqlarını dünyaya yaymalıyıq. Biz müstəqilliyimiz dövründə mədəniyyət sahəsindəki inkişafı hiss etdik”.
Son olaraq mədəniyyət işçisi bu görüşün gənclər üçün vacibliyini vurğulayıb:
“Baş tutmuş möhtəşəm gecə gənclər üçün də çox vacibdir, gələcəyimiz üçün çox vacibdir. Biz bu təşəbbüslərlə onlara qol-qanad verməliyik ki, onlar dövlətimizin diqqət və qayğısını hər zaman hiss etsinlər. Bu, çox vacibdir. Ümumiyyətlə belə tədbirlər hər il bir-iki dəfə keçirilsə, çox faydalı olar”.
Samirə Şərif
17:07 18.12.2024
Oxunuş sayı: 9478
