Gürcüstan cəmiyyəti ikiyə bölünüb: Etiraz aksiyaları yenidən alovlanıb - ŞƏRH
Gürcüstanın paytaxtı Tbilisidə, Rustaveli prospektində etirazçılar nəqliyyatın hərəkətini dayandıraraq parlament binasının qarşısına toplaşıblar. Aksiya zamanı əraziyə polis və xüsusi təyinatlı qüvvələr cəlb edilib.
Mövzu ilə bağlı Crossmedia.az-a danışan politoloq Qalib Ağayev Gürcüstandakı etirazların sosial və siyasi narazılıqlar fonunda yenidən gücləndiyini bildirib. O qeyd edib ki, “Bu aksiyalar göstərir ki, Gürcüstan cəmiyyətində yalnız seçkilərlə maraqlanan deyil, Avropa İttifaqına inteqrasiya etmək istəyən geniş kütlələr var. Gürcü xalqı özünü Avropanın bir hissəsi kimi görür və bu istiqamətdə addımlar atmaq niyyətindədir.”
Qalib Ağayevin sözlərinə görə, bu proseslər beynəlxalq siyasət, xüsusən də Suriyadakı hadisələrdən də təsirlənir. “Gürcülər özlərini digər ölkələrlə, məsələn, İtaliya və İspaniya ilə müqayisə edir və bu da cəmiyyətdə müəyyən narahatlıqlar yaradır. Əhalinin bir hissəsi erkən seçkilərin keçirilməsini, digərləri isə Avropa İttifaqına inteqrasiyanı tələb edir. Beləliklə, cəmiyyət iki hissəyə bölünüb və bu, Gürcüstan üçün ciddi sınaqdır,” - deyə politoloq vurğulayıb.
Hökumətin etirazlara qarşı reaksiyasına toxunan politoloq bildirib ki, “aksiyalarda gözyaşardıcı qaz və su şırnaqlarından istifadə olunur, lakin silah tətbiq edilmir. Bu, hökumətin etirazçılarla münasibətdə həssas davranmağa çalışdığını göstərir.”
Etirazların uzunmüddətli olub-olmayacağı ilə bağlı isə Qalib Ağayev qeyd edib: “Etirazların davamı hökumətin reaksiyasından asılıdır. Əgər narazılıqlar nəzərə alınarsa, vəziyyət nisbətən sakitləşə bilər. Bununla belə, bu proseslər Gürcüstan cəmiyyətində müəyyən birliyin yaranmasına səbəb ola bilər.”
Aksiyaların nəticələrinin yaxın günlərdə daha aydın olacağı gözlənilir.
Maral Şahverdili
13:03 10.12.2024
Oxunuş sayı: 10323
