Hakan Fidan: SDF terrorizm və separatizmlə vidalaşmalıdır
Türkiyənin xarici işlər naziri Hakan Fidan Suriyadakı son hadisələrlə bağlı sərt açıqlamalar verib.
Crossmedia.az bu barədə CNN Türk-ə istinadən xəbər verir.
O bildirib ki, SDF-nin nə bahasına olursa-olsun nəzarətindəki əraziləri qorumaqda israrlı olması Suriyanın sülh və sabitliyə nail olmasına ən böyük maneədir.
Ankarada Omanın xarici işlər naziri Bədr bin Həməd əl-Busaidi ilə birgə keçirilən mətbuat konfransında çıxış edən Fidan qeyd edib ki, bu güzəştsiz mövqe Suriyanın və regionun reallıqlarına ziddir və sülh səylərinə ciddi zərbə vurur.
Nazir xatırladıb ki, yanvarın 6-da Parisdə Ukrayna ilə bağlı görüş zamanı Suriyanın xarici işlər naziri ilə görüşərək, Suriya–ABŞ–İsrail arasında aparılan üçtərəfli danışıqların gedişatını və Suriya hökumətinin SDF ilə münasibətlərini müzakirə edib. Onun sözlərinə görə, Türkiyə bölgədəki həssaslıqları nəzərə alan və Suriyaya sabitlik gətirəcək razılaşmanın əldə olunmasına ümid edir.
Hakan Fidan Hələbdə mülki əhaliyə qarşı hücumların SDF-nin niyyətləri ilə bağlı narahatlıqları artırdığını vurğulayaraq, sonda “SDF artıq terrorizm və separatizmlə vidalaşmalıdır” deyə bəyan edib.
17:25 08.01.2026
Oxunuş sayı: 2033
